Isihluku kudutshulwa umka somatekisi elele
KUNENDIDA ngokubulawa kukankosikazi kasomatekisi waseNquthu okuthiwa udutshulwe ngentululwane yezinhlamvu emzini wakhe.
Kuthiwa uNkk Nombuso Ngobese (38) waseMotshongweni ungenelwe ngumuntu ongaziwa emzini wakhe wadutshulwa amahlandla amaningi, wagcina ngokushona esesibhedlela. Kwenzeka lesi sigameko nje umyeni wakhe ongusomatekisi ulaliswe esibhedlela ngoba egula.
UNkk Ngobese obesebenza esibhedlela saseNquthu, ehlanza isibhedlela, kuvele ukuthi ubelele nengane yakhe eneminyaka eyisikhombisa ngesikhathi kuhlaselwa ngoLwesibili ekuseni emuva kwehora lokuqala. Ingane kuthiwa iphume ngewindi yakwazi ukubaleka ingalimalanga.
Induna yendawo, uMnuz Simon Mhlungwini Buthelezi ithe ivuswe yizingane ekuseni ziyibikela ukuthi kuqhuma isililo emzini kaNkk Ngobese.
“Ngiphuthume khona ngafica kukhalwa, ngatshelwa ukuthi umakoti usedutshuliwe. Ngibe sengicela omunye umfana obe khona ngathi asimphuthumise esibhedlela. Sifike sahlala isikhashana sase sibikelwa ukuthi useshonile. Namanje sisashaqekile ngokubulawa kwakhe ngale ndlela,” kusho uButhelezi. Kukholakala ukuthi umlisa osolwa ngokubulala uNkk Ngobese ungene ngewindi waqonda lapho ebelele khona nengane yakhe. Kuthiwa umlisa uthathe imali ebihlala esisefweni, esamba sayo singakaqinisekiswa, ukhiye wesisefo, iselula kamufi izipele zokhiye bezimoto kodwa akazange athathe moto.
UButhelezi uthe izimoto ebezipake egcekeni bazifice zisekhona okwenza kuxake njengoba lowo mlisa ethathe izipele zokhiye wahamba nazo.
Uthe namanje basashaqekile ngesigameko sokubulawa kukaNkk Ngobese. Uthe lesi sigameko senzeke kukhona unkosikazi nengane kuphela endlini njengoba umyeni wakhe ongusomatekisi esalaliswe esibhedlela ngoba engaphilile. Uthe kwayena usafihlelwe ngesigameko sokubulawa komkakhe ngoba kusatshwa isimo sakhe sempilo.
UButhelezi, osondelene kakhulu nomndeni kaNkk Ngobese uthe bekungakaze kube nokuhlaselwa kuloya mndeni futhi abaqondi ukuthi yini ebingaholela ekutheni abulawe.
“Njengenduna yendawo ngikhathazekile kakhulu ngokuthi kubulawe umuntu wesifazane ngesihluku esingaka. Umphakathi wonke uphatheke kabuhlungu ngokwenzekile,” kusho uButhelezi.
Okhulumela amaphoyisa KwaZulu-Natal, uLieutenant Colonel Thulani Zwane ukuqinisekisile ukuthi amaphoyisa aphenya ngokubulawa kukaNkk Ngobese.
Uthe asikaziwa isizathu sokuhlaselwa kwakhe futhi akukaboshwa muntu mayelana naso.