Bavale imigwaqo befuna imeya
KUSUKE esinamathambo abahlala emijondolo kuForeman, eSydneyham, izolo bevala imigwaqo bedinwe wukuthi imeya yeTheku ebibathembise ukuthi izofika kubona ingalubhadanga.
Lo mphakathi obudinwe ugane unwabu uthe ubulindele ukuthi imeya yeTheku, uNkk Zandile Gumede ifike izokhuluma nabo, iphinde abanike izinto zokwakha kabusha imijondolo yabo njengoba beyithembisile.
Imijondolo yakule ndawo ebalelwa ku-1000 icekelwe phansi wumlilo ngeSonto, kwashona uMnuz Eric Mpanza, unina wengane yakhe uMbali Xulu nengane yabo uSisipho (2).
UMnuz Mqapheli Bonono unobhala wabaHlali baseMjondolo, KwaZuluNatal, uthe bebenethemba lokuthi uNkk Gumede uzofika njengoba ebebathembisile.
“Sasitshelwe ukuthi asime ukuvusa imijondolo ngoba imeya izofika namhlanje ngo1 (esho izolo) izokhuluma nathi. Ngaphandle kokukhuluma nathi bekuthiwe kuzolethwa nezimpahla zokwakha kodwa azifikanga. Uma sifona kuthiwa imeya ibambekile emhlanganweni, esinye isithunywa sawo umasipala sithe imeya ayikho eThekwini futhi ayikaze ithembise ukuthi izoza kithi. Asisazi ukuthi sithembe bani,” kusho Bonono.
Uqhube wathi umphakathi awusalawuleki naye akazi ukuthi imigwaqo izovalwa kuze kube nini, kodwa uzwe kuthiwa uzoyivala kuze kube kufika uNgqongqoshe wezokuHlaliswa KwaZuluNatal uMnuz Ravi Pillay.
UMnuz Mthunzi Gumede okhulumela imeya yeTheku ukuqinisekisile ukuthi imeya beyithembisile ukuthi izoya kuleya ndawo kodwa yavinjwa eminye imihlangano. Yabuye yaya kolunye uhlelo lwezindlu, eWaterloo.
“Imeya ixolisile ngokungaphumeleli kwayo emhlanganweni womphakathi, yathumela umuntu ozoyimela. Siyacela ukuthi umphakathi ubekezele, lolu daba luyasetshenzwa sisacubungula ukuthi lungalungiswa kanjani. Okwamanje sisabheka ukuthi umhlaba le mijondolo eyakhiwe kuyo okabani. Njengoba singakazi ngeke sikwazi ukwakhela abantu kuwo kodwa zikhona ezinye izinhlelo esinazo. Uhlelo lokufakwa kukagesi emijondolo seluqaliwe nakuForeman luzofika,” kusho uGumede (Mthunzi).
Okhulumela amaphoyisa kulesi sifundazwe uCol Thulani Zwane uthe amaphoyisa akhona kuleya ndawo, asiqaphile isimo.