Ahoxisiwe amacala eFacebook koweDA
I-DA KwaZulu-Natal isamukele isinqumo sokuhoxiswa kwecala ebelibekwe omunye wabaholi bayo uNksz Mbali Ntuli, owaseka umbhalo kuFacebook owawusola uNdunankulu waseWestern Cape uNkk Hellen Zille, ngokuthi uyacwasa.
Engxoxweni neSolezwe izolo, uNksz Ntuli oyilungu lesiShayamthetho uthe ujabule kakhulu ngokuhoxiswa kwecala wengeza ngokuthi lokho kuzomenza akwazi ukunaka umsebenzi wakhe.
“Ngiyajabula futhi ngiyabonga ukuthi isigungu esiqondisa ubugwegwe eqenjini sithathe lesi sinqumo ngoba nami kade ngasho ukuthi ayikho into engimangalelelwe yona,” kusho uNksz Ntuli.
Uthe umbiko wokuqala owaphuma ngemuva kophenyo wathi akanalo icala kodwa uNgqongqoshe wezokuHlaliswa kwaBantu eWestern Cape, uMnuz Bongani Madikizela, wathi akuqhutshekwe necala.
Umholi we-DA esifundazweni, uMnuz Zwakele Mncwango, izolo uthe bayasamukela isinqumo sokuhoxiswa kwecala likaNksz Ntuli.
“Lesi sinqumo siyakhombisa ukuthi iqembu lizimisele ngokunaka kakhulu indaba yokhetho luka-2019. Inhloso yethu enkulu wukuvikela izwe enkohlakalweni ekhona,” kusho uMncwango.
Uthe ucabanga ukuthi isigungu sibheke kakhulu ukubaluleka komsebenzi obhekene neqembu sabona ukuthi indaba yamacala angaphakathi awalisizi iqembu.
“Siyasijabulisa lesi sinqumo ngoba uNksz Ntuli ungomunye wabaholi abasebenza ngokuzikhandla esifundazweni manje usezokwazi naye ukukhankasela iqembu ngokukhululeka anganaki indaba yokuthi unecala elingakaphothulwa,” kusho uMncwango.
USihlalo wekomiti elibhekele ezomthetho kwi-DA, u-Advocate Glynnis Breytenbach, uthe amacala abebekwe uNksz Ntuli ahoxisiwe kuze kube kuqhamuka ubufakazi obusha.
UMadikizela ngoMeyi nonyaka ubeke uNksz Ntuli icala ethi weseke umbhalo othi uNkk Zile uyacwasa. Baningi abaholi be-DA asebengene obishini ngokusebenzisa budedengu izinkundla zokuxhumana, okuholele ekutheni iqembu libeke imigomo eqinile.
UNkk Zille naye useke waba senkingeni ngemuva kwemibhalo eminingi ayenzile kubalwa nothi kukhona okuhle okwenziwa uhulumeni wobandlululo.
Obeyilungu leqembu esifundazweni, owahoxiselwa ubulungu, uNkk Penny Sparrow wangena obishini ngokufanisa abantu abamnyama nezinkawu.
Ngo-2015, ilungu lePhalamende le-DA, uNkk Diane Kohler Barnard, lazithola lisenkingeni ngemuva kokuncoma ubuholi bukaMnuz PW Botha ongumunye womengameli bobandlululo kuleli.