Bathi kungcono kuxoshwe uDhlomo kunophethe umnyango
BATHI kungcono kuhambe uNgqongqoshe wezeMpilo KwaZuluNatal, uDkt Sibongiseni Dhlomo kunokuthi kuxoshwe inhloko yalo mnyango esanda kumiswa.
Izinyunyana zabasebenzi bezempilo, sezizwakalise ukungasenameli isinqumo sokumiswa kukaDkt Sifiso Mtshali oyinhloko yomnyango wezeMpilo KwaZulu-Natal.
UMnuz Mandla Shabangu ongumgqugquzeli wenyunyana yabahlengikazi, iDemocratic Nursing Organisation of South Africa (Denosa) e-KZN uthe babona kungcono kuxoshwe uDhlomo kunokuthi kumiswe uMtshali.
Uthe isigungu esiphezulu sale nyunyana esifundazweni sinqume ukuthi kungangcono ahambe uDhlomo.
“Kufanele uNgqongqoshe akhululwe emsebenzini wakhe bese kunikwa ungqongqoshe omusha ithuba lokusindisa umnyango emacaleni obudedengu, alungise nesimo sezempilo esintengayo esifundazweni nesesiqhubeke isikhathi eside,” kusho uShabangu.
Ubekusho emuva kokuthi sekumiswe uDkt Mtshali okukholakala ukuthi umiswe emuva kwezinkinga zokuphazamiseka kokulashwa kweziguli ezazinomdlavuza ezibhedlela zaseKZN.
UShabangu uqhube wathi babona isinqumo sokummisa sizodala ukuphazamiseka kokusebenza emnyangweni njengoba kungeke kuthathwe zinqumo ingekho inhloko yomnyango.
Uthe abasho ukuthi akangajeziswa uma enze okungafanele futhi kunezizathu ezibambekayo kodwa akungenziwa izinto ezizogcina zifake umnyango ezinkingeni zezomthetho.
Unxenxe umnyango ukuthi ukuthathele phezulu ukuqasha abahlengikazi abaqeqeshelwe ukunakekela iziguli ezinomdlavuza.
UDkt Mzukisi Grootboom wenyunyana yodokotela iSouth African Medical Association (Sama) uzwakalise ukukhathazeka ngokumiswa kukaDkt Mtshali okuthiwa umiswe nguNdunankulu uMnuz Willies Mchunu.
UDkt Grootboom uthe uma uDkt Mtshali esephutheni akufanele kube nguye yedwa omiswayo kodwa nabangaphezu kwakhe kufanele benziwe okufanayo.
“Noma sikweseka ukuthi abasebenzi okubalwa kubo odokotela nabaphathi baqondiswe ubugwegwe, sikholwa wukuthi izinkinga zezempilo esifundazweni bezikhona ngaphambi kokufika kukaDkt Mtshali kanti futhi ukumxosha kufana nokucasha ngesithupha,” kusho uDkt Grootboom.
Uthe kule minyaka emihlanu ephelile iSama beyilokhu yexwayisa uMnyango wezeMpilo ngezinkinga ezikhona kwezempilo esifundazweni kodwa benganakwa, kunalokho kuthiwa badlala ipolitiki.
Izinhlangano zezepolitiki nazo sezizwakalise ukungasithakaseli isinqumo sokumiswa kwaDkt Mtshali, ilungu lesishayamthetho le-IFP, uNkk Ncamisile Nkwanyana uthe bebelindele ukuthi uMchunu axoshe uDhlomo.
“Ukuhluleka kukandunankulu ukuthi axoshe uDkt Dhlomo ngenxa yezinkinga zoMnyango wezeMpilo, kukhombisa ngokusobala ukuthi akanandaba nempilo yabantu bakulesi sifundazwe,” kusho uNkk Nkwanyana.
Isolezwe lithinte okhulumela uMchunu uMnuz Ndabfezinhle Sibiya, ushaye ngamafuphi wathi, “uNdunankulu uzophawula ngesikhathi esifanele ngalolu daba,” kusho uSibiya.