UZuma uthi yiDA edlala ngemali ivula amacala
UMENGAMELI Jacob Zuma uthi ukuguqula ikhabhinethi yilungelo lakhe elikumthethosisekelo, umuntu ofuna ukwazi lolu hlelo kumele anqobe ukhetho.
UZuma ubephendula imibuzo izolo ngesikhathi kuhlangene umkhandlu wezifundazwe.
Ubuzwe yilungu le-DA uMnuz Johan Londt ngesinqumo sakhe sokukhipha owayenguNgqongqoshe wezeziMali kuleli uMnuz Pravin Gordhan.
Uphendule ngokuthi isigaba somthetho uSection 91, womthethosisekelo, uyamvuna ukuthi angabashintsha ongqongqoshe uma ebona kunesidingo.
Uthe ukwenza lokhu ngemuva kokujula kabanzi ngomqondo.
ULondt uphinde wabuza uZuma ukuthi ngabe ufake uMnuz David Mahlobo njengoNgqongqoshe wezaMandla ngoba efuna kusheshiswe uhlelo lukagesi wenuzi?
UZuma ukugcizelele ukuthi ukushintsha ongqongqoshe yisinqumo sakhe wathi isizathu sokushintsha ongqongqoshe asikho isidingo sokuthi saziwe abantu.
“Uma ufuna ukwazi wina ukhetho ube nohulumeni,” kusho uZuma.
UMnuz Mntomuhle Khawula we-IFP, uthe isinqumo sokuxosha uDkt Blade Nzimande njengongqongqoshe weMfundo ePhakeme phezu kwempumelelo yakhe akuwenzi umqondo.
UZuma uphendule ngokuthi asikho isinqumo umengameli asithathayo esingawenzi umqondo. Uthe izindleko zamacala angu783 enkohlakalo abhekene nawo zizokhokhwa wumbuso. “Ngeke ngizikhokhele lezi zindleko. Ukube i-DA izwelana nabantu, ngeke ibayise ezinkantolo ngaso sonke isikhathi. Ngeke ube nekhekhe uphinde uzidlele, nisimoshela isikhathi,” kusho uZuma.
Ngo-Okthoba uZuma nophiko lwezokushushisa kuleli bakhale ngaphansi enkantolo yezokudluliswa kwamacala kuleli yokuzama ukuguqula isinqumo senkantolo enkulu sokuhoxisa amacala abhekene nawo.
“I-DA iya ezinkantolo ngayo yonke into bese imali yabakhokhi bentela isetshenziselwa ukuvikela labo abasebenza kuhulumeni,” kusho uZuma.