Abegatsha likaDlamini Zuma bayaphikelela
UBUHOLI begatsha likaDkt Nkosazana Dlamini Zuma u-ward 32, eThekwini buthi buyaqhubeka nokuba nomhlangano ngeSonto yize buhlakazwe yisigungu se-ANC esifundazweni.
Engxoxweni neSolezwe izolo, uNobhala waleli gatsha uMnuz Siya Njokweni, uthe sebebhalele ubuholi besifundazwe nobukazwelonke bebazisa ukuthi umhlangano bazona nawo ngeSonto.
“Akusekho ukujikela emuva umhlangano uzoba khona nohlu lwamagama abantu abazovota lukhona, lukimina njengonobhala wegatsha,” kusho uNjokweni.
Uthe yize behlakaziwe kodwa bayasidlulisa isinqumo, basalinde impendulo ezobanika igunya lokuthi baqhubeke nomsebenzi.
“Nobuholi besifundazwe inkantolo yathi abuhlakazwe, basidlulisa isinqumo okwenza bukwazi ukuqhubeka nomsebenzi, yinto efanayo nakithina,” kusho uNjokweni.
Uthe bazokhetha iPhini likaMengameli uMnuz Cyril Ramaphosa esikhundleni sikamengameli emhlanganweni wabo.
“EMangaung sakhetha uRamaphosa ukuba iphini likamengameli. Njengoba siya engqungqutheleni kaDisemba sizokhetha yena esikhundleni sikamengameli ngoba besingakatshelwa lutho ukuthi akakulungele ukuthi angahola iqembu kodwa umlando wakhe kwezombusazwe ukhomba ukuthi unawo amava okuthi angahola inhlangano,” kusho uNjokweni.
Uthe uDkt Dlamini Zuma ubengakaze eze kubona beyigatsha abatshele ukuthi uzongenela isikhundla sikamengameli.
“UDlamini Zuma usegatsheni lethu impela, ubulungu bakhe ubuvuselela kimina kodwa ubengakaze axoxe nathi. Simbona kumathelevishini nasemaphepheni ethi naye usigaqele isikhundla. Kumele ngikucacise ukuthi asinankinga naye futhi siyamhlonipha kodwa thina seseka uRamaphosa,” kusho uNjokweni.
UNjokweni uthe bebevele bazi ukuthi sizokwelulwa isikhathi semihlangano yamagatsha.
UNobhala-jikelele we-ANC uMnuz Gwede Mantashe, umemezele ukuthi bayaselula isikhathi sokuhlalisa imihlangano yamagatsha.
Uthe usuku lokugcina manje lwemihlangano sekuzoba yiSonto.
“Ubuholi be-ANC esifundeni iTheku bucindezela igatsha lethu ngoba nakhu kwaziwa ukuthi seseka uRamaphosa,” kusho uNjokweni.
Engxoxweni nesiteshi sethelevishini i-eNCA izolo ekuseni, uNobhala we-ANC esifundeni iTheku uMnuz Bheki Ntuli, uthe akusilo iqiniso ukuthi bahlakaza ubuholi be-ward 32, ngoba buseka uRamaphosa.
“Leli gatsha belikhungethwe yizinkinga kungasebenzeki, sabe sesithatha isinqumo sokuthi singenele ngokuhlakaza ubuholi bakhona,” kusho uNtuli.
UNjokweni uthe bayazi ukuthi uMantashe usewubuyisile umbiko ebuholini besifundazwe othi ikhansela laku-ward 32, kumele lihoxiswe esikhundleni ngoba lakhethwa ngendlela engafanele.
UNobhala we-ANC esifundazweni uMnuz Super Zuma wathi bayawazi umbiko kaMantashe sekusele ukuthi bathathe izinyathelo.