Bancoma okwenzeka eZimbabwe abokufika
ABOKUFIKA baseZimbabwe abazinze kuleli bathi yize bengahambisani nokuqhwagwa kombuso kodwa sekuyisikhathi sokuba nomengameli omusha.
Bebephawula ngemizamo yamasosha aseZimbabwe yokuketula uMengameli Robert Mugabe osebuse iminyaka engu37. Kusuka ngoLwesithathu isimo sishubile eZimbabwe njengoba kubikwe ukuthi uMugabe uvalelwe endlini, amasosha alawula izwe.
UMnuz John Mhandu (31) owenza iPhd kwiSociology e-University of KwaZulu-Natal, uthe akanendaba nokwenzeka ezweni lakhe inqobo nje uma kuzoba nokuthula.
“Abantu baseZimbabwe sebehlupheke kwanela, alusekho nozinzo kwezepolitiki. Sekuyinto ejwayelekile ukuthi awukho umsebenzi uma useZimbabwe. Sithemba ukuthi okwenzekayo kuzoba yisiqalo sezinto ezintsha nezingcono. Umnotho ushona phansi, sihlupheka sinawo umcebo wezokumbiwa kodwa akusizi ngoba abatshali bezimali bayabaleka,” kusho uMhandu.
Uthe bayazi ukuthi kuningi okuhle okwenziwe uMugabe eqala ukubusa kodwa useyahluleka.
Usola noNkk Grace Mugabe athi sekukhala isicathulo sakhe eqenjini iZanu PF, eselihlukene phakathi.
UMhandu uthe wafika kuleli ngo-2012 ezozama impilo.
Umndeni wakhe usasele eZimbabwe. Uthe uwuvakashela kanye noma kabili ngonyaka.
UMnuz Stanley Gezi (37) osebenza ehhotela eliseCape Town, uthe indlela anenkani ngayo uMugabe ngeke amangale uma imizamo yokumketula ingaphumeleli. UGezi wafika kuleli ngo-2008 ezofuna umsebenzi ngenxa yokungawutholi eZimbabwe.
“Umnotho uyafadabala eZimbabwe nemisebenzi ayikho. Ngithandazela ukuthi kungasuki impi ngenxa yalesi simo esiqhubekayo,” kusho uGezi.
Yize engakujabulela ukungena kukamengameli omusha, kodwa uthe kuzothatha iminyaka ukuthi uphinde ukhule umnotho.
Uthe abatshali bezimali namanye amazwe ase-Afrika, awasayithembi iZimbabwe.
“Ngibona kuyisiqalo sekusasa eliqhakazile okwenzekayo. IZimbabwe isemathubeni okwenza kahle kwezomnotho uma ilawulwa ngendlela entsha. Abantu baseZimbabwe abanendaba ukuthi ubani ozoba ngumengameli omusha ngoba sebehlupheke kakhulu, okubalulekile wukuthi bangalambi,” kusho uGezi.
Ngesikhathi sokuloba i-African News Agency ibike ukuthi uMengameli Jacob Zuma onguSihlalo weSouthern African Development Community, usethumele ithimba lakuleli ukuyoba yingxenye yezingxoxo eZimbabwe.
Kuleli thimba kubalwa uNgqongqoshe wezokuVikela uNkk Nosiviwe Mapisa-Nqakula nowezokuPhepha koMbuso uMnuz Bongani Bongo.
Imithombo yaseZimbabwe iveze ukuthi uMugabe uthe usazithatha njengomengameli futhi akazimisele ngokushenxa.
UMnuz Simon Khaya Moyo oyisikhulumi sikahulumeni eZimbabwe, uthe bazokhipha isitatimende esiqondile uma sekucacile ngezingxoxo eziqhubekayo. IKHASI ELIKHOKHELWE