Uthengele abafelokazi amatekisi
BASWELE amaphiko okundiza abafelokazi bosomatekisi baseNanda ngesikhathi bethengelwa amatekisi ngusihlalo kasoseshini wabo ngoLwesithathu.
Laba bafelokazi bebengasenawo amatekisi emuva kokushona kwabayeni babo abadutshulwa ngesikhathi kunodlame lwamatekisi.
NgoLwesithathu uMnuz Siyabonga Getsemane ongusihlalo weNanda Taxi Owners Association (Durban Liner) unikeze abafelokazi abangu-12 amatekisi amasha athe bazoqhuba ngawo umsebenzi owashiywa ngabayeni babo.
“Kunomama abashonelwa ngabayeni ngesikhathi sodlame lwamatekisi. Emuva kokushona kobaba omama baba nezingqinamba ekuqhubeni umsebenzi. Sithole ukuthi amaphemithi abo abesephelelwe yisikhathi kanti nezimoto bebengasenazo. Sibone kubalulekile ukuthi sibathengele izimoto ukuze bakwazi ukuqhubeka nempilo,” kusho uGetsemane.
Uthe bekungelula ukuthengela abafelokazi amatekisi ngoba bekufanele alungise amaphemithi abo ebhodini lezokuthutha eMgungundlovu bese exoxisana namabhange ukuze amnikeze isikweletu.
“Omama sizocathula nabo njengoba sebenamatekisi abo, sibafundise ukuthi umsebenzi uphathwa kanjani ukuze bawakhokhele kahle amatekisi. Uma umama eseqedile ukukhokhela itekisi lakhe sizoqinisekisa ukuthi uthenga elinye ukuze ahlale enemali yokuphilisa yena nezingane zakhe,” kusho uGetsemane.
Ugqugquzele abanye ososeshini ukuthi bangakhiphi inyumbazane abafelokazi.
Omunye wabafelokazi abahlomulile uNkk Zanele Mafuleka (55) owashonelwa ngumyeni wakhe uMnuz Zakhele Samson Mafuleka ngo-2007 uthe ujabule ngendlela engachazeki.
“Ngiswele imilomo yokuzibongela, ukube ngiyakwazi ukundiza ngabe ngiyandiza ngoba bengingazitsheli ukuthi usoseshini uzosithengela amatekisi,” kusho uNkk Mafuleka.
Kubafelokazi abafana naye ucele ukuthi babekezele uma sebeshonelwe ngabayeni futhi bahlale emizini yabo ngoba ososeshini bayazenza izinhlelo zokubanakekela.
“Siphethwe kahle kusoseshini wethu ngoba siyahlonishwa futhi siyahlolwa ukuthi impilo isiphethe kanjani selokhu kwashona abayeni. Abanye abafelokazi ngicela baxoxisane nososeshini balapho bekusebenza khona abayeni ukuze baqhubeke nokuthola isinkwa,” kusho uNkk Mafuleka.