Uqophe umlando kwabamnyama
UQOPHE umlando owesifazane osemncane ngokuba ngowokuqala omnyama ongudokotela ohlinza abanenkinga yobuchopho nomgogodla, othe ubefuna ukuba yisibonelo kwabanye abasaba lo msebenzi.
UDkt Nomusa Shezi (32) waseMgungundlovu, usebenzela esibhedlela eNkosi Albert Luthuli Central, eThekwini. Uqede emasontweni amathathu edlule ukuqeqeshelwa ukuba yiNeurosurgeon ophikweni lweDiscipline of Neurology kwiSchool of Clinical Medicine e-University of KwaZulu-Natal. Baseyindlala abesifazane abamnyama kulo mkhakha. Uthe bayisihlanu sebebonke kuleli. Owokuqala waphothula ukuqeqeshwa ngo-2013.
“Bengivele ngiqhubeka nokuhlinza nsuku zonke ngoba kuyingxenye yokuqeqeshwa. Ngaqala ukuhlinza ngo-2012 kodwa namanje akulula kulo mkhakha okusekhonya kuwo abesilisa. Ngifunde ngoba ngifuna ukushintsha imiqondo yabantu, ngibe yisibonelo nakulabo abasabayo ukungena kulo mkhakha,” kusho uShezi.
Echaza ngomsebenzi wakhe uthe ubhekene neziguli ezinezifo ezihlobene nenkinga yobuchopho nomgogodla. Ezinye zisuke zinomdlavuza noma isimila ebuchosheni. Uhlinza nabasuke benenkinga yokungazweli kwemishanguzo.
“Bancane odokotela abenza lo msebenzi, balinganiselwa ku-200 kuleli. Kuyinselelo enkulu lokhu ngoba baningi abadinga ukuhlinzwa. IKwaZulu-Natal yisifundazwe sesibili esinabantu abadinga amaNeurosurgeon ekubeni sisodwa isibhedlela esinawo,” kuchaza uDkt Shezi.
Uthe kudingeka isibindi nokubekezela ngoba kunzima ngisho ukuqeqeshwa. Ukuba yiNeurosurgeon kuhambisana nokusebenza amahora amaningi nesidingo sokucophelela ngokweqile. Kuyenzeka ahlinze ubusuku bonke noma ngesikhathi okufanele ngabe usephumile emsebenzini. Uthe okwenza abesifazane basabe ukuthi mningi umsebenzi futhi kugcwele abesilisa kuwona. Ukukhula kwakhe ngeminyaka ka-1990 kusasatshwa ingculaza, uDkt Shezi waba nothando lokuletha ithemba kubantu ngokubelapha.
“Ayikho into engijabulisa njengokubona umndeni ujabulela ilungu lawo selihlinziwe. Omunye usuke engasakwazi nokuhamba ngenxa yomgogodla kodwa alulame emuva kokuhlinzwa. Ukuhlinza kukodwa kuyasabeka, kunzima kakhulu uma kuhlobene nobuchopho yingakho nabanye besaba ukungena kulo mkhakha.”
UDkt Shezi okumanje uhlela ukwenza iMasters Degree, ufisa nokusungula ithimba lodokotela abazobhekana ngqo nabadinga ukwelashelwa izifo ezikhinyabeza ukuhamba.
Ukusebenza kanzima uthe kwenza sibe sincane isikhathi sabangani njengoba uma ephumule ufunda incwadi noma alale kuphela.