Akutholwe isixazululo sesimo saseZimbabwe
SEKUPHELE iminyaka ewu-37 uMnuz Robert Mugabe ebusa iZimbabwe ngesandla sensimbi, egudluza kwasani ayibona iyisitha noma yisiphazamiso okugcine kufake izwe obishini.
Manje kubonakala sengathi useketuliwe nokungagudluzi yena kuphela kodwa nomkakhe, uNkk Grace Mugabe.
Ekuseni ngo-Ephreli 17 1980, umfundi wezindaba weZimbabwe Broadcasting Corporation, uNksz Mandy Mundawarara wamemezela ukuthi: “IZimbabwe izoba yizwe elisha kusukela namhlanje ebusuku. Phakathi kwemicimbi ezoba khona ukugubha lokhu wukugcotshwa kozoba nguMengameli, uMnuz (Canaan) Banana noNdunankulu, uMnuz Mugabe.”
I-Zanu-PF yayizidlele amahlanga okhethweni ngamavoti angaphezu kuka-90%. Abelungu eZimbabwe, eyayaziwa ngeRhodesia ngaleso sikhathi, basala beshaqekile. Esemusha uMugabe wayesho zonke izinto ezinhle. Kodwa izinselelo zepolitiki nesimo sezulu kwenza izinto zaba lukhuni.
Okwalandela lapho wukuthi uMugabe wayengasathembi lutho. Izitha zazigudluzwa, amaqembu aphikisayo ayephazanyiswa nawo.
Kuthe uma umnotho kucaca ukuthi uyazika ngempela uMugabe wakhetha ukwethula imigomo engaphusile kodwa ayazi ukuthi izomhehela abalandeli. Wakhipha umyalelo wokuthi kudliwe ngodli amapulazi abelungu, amaningi awo anikwa abangani bakhe abangosopolitiki kwiZanu-PF. Amandla edollar laseZimbabwe ehla, izinkumbi zabantu zawelela eNingizimu Afrika zibalekela ububha, ukushaywa nokuboshwa.
Manje kubonakala sengathi umbutho wezokuvikela yiwona osulawula izwe. Uthe uMugabe uphephile kodwa ufuna abantu abasondelene naye.
UMugabe usanda kuxosha obeyiphini lakhe, uMnuz Emmerson Mnangagwa. Ukuxokozela eZimbabwe kusithinta kakhulu. Kumanje bangaphezu kwesigidi abantu bakhona okukholakala ukuthi bakuleli. Lesi siphithiphithi sisho ukuthi isibalo sizonyuka.
Esikucelayo kuhulumeni wakuleli ukuthi usebenzisane ne-African Union ukuze kutholakale isisombululo eZimbabwe. Lokhu futhi kufanele kuhambisane nokuthi abantu banikezwe ithuba lokuzikhethela ukuthi ngubani abafuna ababuse.