Ayilalelwanga iNhlangano yeZizwe
MHLELI: Ngonyaka ka-1998, inhlangano yezempilo emhlabeni, iWorld Health Organisation (WHO) yakhipha isexwayiso esasithi: “Ngonyaka ka 2020 izingozi zemigwaqo e-Afrika yonke ziyobe zibulala abantu abaningi ukwedlula zonke ezinye izifo.”
Ngaleso sikhathi izingozi zezimoto zazikleliswe zingunombolo 12 ohleni lwezifo ezibulala ukwedlula ezinye. Ingculazi nesandulela sayo yayikunombolo 3 ngesikhathi esifanayo.
Uma sibuyekeza uhlu olufanayo lwezifo namhlanje sithola ukuthi ingculazi ayisekho ku top 10 wezifo ezibulalayo kodwa izingozi zomgwaqo zingunombolo 3. Lokhu kusho ukuthi eNingizimu Afrika maningi amathuba okufa ngengozi yemoto ukwedlula ukugula.
Okwethusa kakhulu ukuthi iningi labantu abedlula emhlabeni ngezingozi zomgwaqo ngabantu abanomthelela emnothweni wezwe.
Akekho noyedwa uhulumeni wase-Afrika owasisukumela isexwayiso seWorld Health Organisationi. Ukube kwakuthathwe izinyathelo ezifanayo nezathathelwa ingculazi ngabe sikhuluma okwehlukile.
Ngesikhathi kwakhiwa izimoto, abenzi bazo bebazi ukuthi kuyokwenzeka zibe sezingozini zomgwaqo kodwa lokho akusho ukuthi sekumele kufe abantu. Ubuchwepheshe bokuphepha obutholakala ezimotweni ezakhiwa kulesi sikhathi benza ukuthi izimoto ziphephe ngendlela emangalisayo. Empeleni engozini ebucayi kufanele umshayeli nabagibeli baphume bengenamyocu, imoto ilimale iphele ize ikhishwe emgwaqweni.
Lapha sibala ubuchwepheshe bokuphepha obufana ne ABS, ESP, EBD, TCS, PRS, SRS, FDS neLAS, ukukha nje phezulu. Ngeshwa, uma ungumshayeli ungabazi lobu buchwepheshe obubalwe ngenhla futhi ungazi ukuthi benzani emotweni, imoto yakho ingakubulala inabo bonke.
Kuliqiniso elingephikwe ukuthi iNingizimu Afrika ifuna ukubalwa namazwe ahamba phambili emhlabeni kodwa indlela esisenza ngayo izinto isasele emuva kakhulu. Iningi labashayeli lithatha izincwadi zokushayela ezingo code 10, C1, okuyizincwadi zokushayela amaloli asisindo sawo sifinyelela ku 16000KG ngoba kulula ukuphasa, abadingi ukwenza izinto ezifana neParallel Parking, Alley Docking ne 3-Point Turn. Kodwa uma sebethenga izimoto bathenga ezinesisindo esingu 3500KG ezidinga izincwadi ezingu code 8, B, EB ezidinga ulwazi lwe-Parallel Parking nokunye. Sipho Kunene ENEWCASTLE