Wunkosikazi onezwi ezintweni zikamufi, hhayi amalungu omndeni
NGELEDLULE ezeMingcwabo zathembisa abafundi bale ngosi ukuthi kuleli sonto zizogxila esihlokweni esithanda ukuba yinkinga esizweni esimnyama esithinta ukushona kwelungu lomndeni, emuva kwalokho bese kuvela ukuthi belishadile kodwa kungaziwa.
Miningi imindeni ehlukumezekayo ngesenzo esifuze leso ngoba kweminye kuba nzima ukuyofuna izabelo zikamufi lapho abesebenza khona ngoba kwesinye isikhathi kuke kufuneke lowo muntu ashade naye ngoba ubembhalile ezintweni zakhe emsebenzini.
UNksz Nolwazi Malimela, ongummeli, uthe uma umuntu eshonile kwenzeka okubili, kuya ngokuthi ubenalo yini ifa noma cha.
“Uma umuntu eshona incwadi yokufa yenziwa eMnyangweni wezaseKhaya. Iyona evezayo ukuthi umufi ubeshadile noma cha.
Uma kuwukuthi ubeshadile, umndeni wakhe kumele wenze imizamo yokuthi umthole lowo ashade naye,’’ kusho uNksz Malimela.
Uqhube wathi uma ubekhona obeshade naye, cishe konke okuthinta umufi, ngokomthetho kumele kwenganyelwe uyena, umndeni kamufi awungeni ndawo.
“Lowo okuvela ukuthi ushade nomufi uyena okumele abhekelele izingane zakhe umufi nanokuthi ifa lakhe licazeka kanjani uma kuwukuthi ubengalibhalile.’’
Kweminye imindeni, owesifazane osuke eshade nomufi, ikakhulukazi isinyenyela njengokuyobhala eMnyangweni wezaseKhaya, abayizwa indaba yakhe.
Uze asolwe nangokugaqela imali yomyeni wakhe, ingasaphathwe-ke eyokushona kwakhe ngoba esikhathini esiningi kusolwa yena.
UNksz Malimela uxwayise nangokubaluleka kokubhalwe kwefa ngoba lokho kugwema umsindo emndenini nasezihlotsheni.
Eminye imindeni ize ibange isitifiketi sokushona sikamufi ngenxa yokuthi basuke befuna ukuyihambisa ezinkampanini zemishwalense ukuze izokhokha.
Ezikhathini eziningi abanye bagcina bengakhiphanga ngisho nendibilishi emngcwabeni kamufi, yize basuke sebedlile ngaye.
Kulabo abafihla izihlobo zabo, sengathi uNkulunkulu angabaqinisa ngalesi sikhathi esinzima.
Asihlangane ekhasini lethu kuFacebook: Isolezwe Ezemingcwabo.