Kufanele sithole amagoli eDR Congo: Thuso Phala
ESINYE sezethenjwa zeSuperSport United, uThuso Phala, siyavumelana nomqeqeshi waso u-Eric Tinkler ngokuthi ayikho into emqoka njengokuya eDR Congo bafike bathole amagoli.
UTinkler uthe kuzofana nokuhambela ubala uma bengabuya bengashayanga ngisho elilodwa igoli lasekuhambeni uma sebetholene phezulu neTP Mazembe emdlalweni womlenze wokuqala wamanqamu eCaf Confedetion Cup.
Umdlalo useStade Frederic Kibassa, eLubumbashi, ngeSonto ngo-3.30 ntambama.
Umlenze wesibili useLucas Moripe Stadium ngoNovemba 25 ngo-8.15 ebusuku.
Kuzobe kungokwesibili i-United iya eLubumbashi kulo mqhudelwano. Emdlalweni odlule i-United ibuye namagoli amabili ekuhambeni umdlalo uphela ngo 2-2.
“Sabuya kade silandela ngemuva ngamagoli amabili. Lokho kuyasikhuthaza ukuthi singaya kubona sifike sishaye amagoli futhi singahlulwa, okuyiyona into esizimisele ngokuyenza,” kusho uPhala.
Lo mdlali, osenamazisini amathathu eyibambe kuMatsatsantsa a Pitori, nozakwabo basanda kujabulela ukunqoba izicoco ezimbili kulandelana. Baqale bathatha iNedbank Cup ngoJuni base belandelisa ngeMTN 8.
“Lona yiwona mdlalo omkhulukazi wamanqamu engizowudlala. Kwesinye isikhathi ithuba elifana naleli lifika kanye empilweni ngakho yithuba engizimisele ngokulisebenzisa,” kusho uPhala.
I-United izojoyinwa abadlali bayo abebeyibambe kwiBafana Bafana abangazange baziqeqeshe neqembu eRustenburg lapho belizicija khona enkundleni yotshani bokwakhiwa okuyiyona abazoyisebenzisa eLubumbashi. Abadlali abebengekho uClayton Daniels, Dean Furman, Ronwen Williams, Bradley Grobler, Jeremy Brockie (obehambe nezwe lakhe iNew Zealand) noMorgan Gould. UGould ngeke ayidlale eyamanqamu ngenxa yamakhadi. Kulindeleke ukuthi emuva indawo yakhe ithathwe uTefu Mashamaite.
UReneilwe Letsholonyane yena uzophuthwa wumlenze wokuqala ngenxa yalo ikhadi eliphuzi.
UTinkler uyakuqonda ukuthi bayobhekena neqembu eselinemidlalo cishe eyishumi yamanqamu emiqhudelwaneni yeCaf.
“Kumele siye laphaya sifike sishaye amagoli. Noma kungaba ngu 1-1 noma sihlulwa ngo 2-1. Ukushaya amagoli yikhona okusemqoka. Lokho sizokwenza ngokudlala ibhola eliya phambili. Umphumela ka 0-0 ngeke uze usisize,” kusho uTinkler.
IMazembe izobe ilwela ukuvikela isicoco esinqobe nyakenye. I-United iyofuna esokuqala kwiCAF.