Ufunwa amaligi amakhulu phesheya uJali
UMDLALI weBafana Bafana u-Andile “Gattuso” Jali angase aphelele eFrance, Germany noma eSpain ngesizini ezayo.
Njengamanje uJali ugijima kwiKV Oostende yaseBelgium kodwa inkontileka yakhe iyaphela ngoJuni. Imenenja yakhe, uMike Makaab weProSport International, iyona eqinisekise izindaba zokuthi uJali kungenzeka aphelele eFrance, Germany noma eSpain.
“Uzohlala phesheya uJali. Ukuthi uzohlala kuphi nami anginaso isiqiniseko. Kunenqwaba yamaqembu aphesheya aqaphe isimo sakhe. Uma eshiya kungenzeka aphelele eFrance, Germany noma eSpain ngoba kunzima ukutholela umdlali ikhaya e-England naseItaly.
“E-England kunalo mshikashika wokuthola amaphepha akhona. Kunzima kakhulu-ke njengoba iBafana ikleliswe ngaphandle kwamazwe angu-60 ahamba phambili emhlabeni. E-Italy kunemithetho eminingi ethinta abadlali bangaphandle. Lokhu kwenza kube umthwalo ukutholela abadlali amakhaya khona,” kusho uMakaab.
Uma uJali ephelela eFrance uzohlangana nozakwabo okubalwa kubona uKeagan Dolly, Bongani Zungu, Lebo Mothiba noKermit Erasmus bonke abagijima kule lizwe.
“UJali usasalelwe yizinyanga eziyisikhombisa kwinkontileka yakhe ne-Oostende. Iqembu lisaneme ngomsebenzi wakhe futhi kungenzeka limnike inkontileka entsha kodwa sizoyibheka bese siyiqhathanisa nezinye izicelo. Kulezi zinyanga ezedlule ifomu yakhe inyukile.
UJali akamdala kodwa futhi iminyaka yakhe ayehli.
Ngakho kumele senze isiqiniseko sokuthi sithatha isinqumo esifanele ngekhaya lakhe elisha,” kusho uMakaab.
UJali usemele izwe amahlandla angu-44, washaya amagoli amahlanu.
“Njengamanje uJali ugxile eqenjini lakhe. Ubheke ukugcina umgqigqo wakhe omuhle enkundleni,” kuphetha uMakaab.
UJali kuke kwaba nemibiko yokuthi angase abuyele eNingizimu Afrika ezinyangeni ezedlule kodwa uMakaak wayikhahlela ngazo zombili ebalula ukuthi usafuna ukudlala phesheya. Lo mdlali ungomunye wababhekwe ukuthi basize iBafana ivale ihlazo lokuphuthwa ukuya kwiNdebe yoMhlaba eseRussia ngonyaka ozayo, uma sekuqhubeka eyokuhlungela i-Afcon ka-2019.
IBafana izobhekana neLibya eMoses Mabhida Stadium, eThekwini, ngoMashi. Emdlalweni wokuqala iqembu lakuleli lenze kahle kakhulu lishaya iNigeria ngo 2-1 ekuhambeni.