Igabe ngobuchwepheshe i-Audi Q5

NGESIKHATHI abakwaAudi bethula iQ5 entsha maphakathi nonyaka bethula nezinhlobo ezimbili zezinjini.

Kukhona eyi-2.0 litre TDI kadizili kanjalo ne-2.0 TFSI okuyinjini kaphethroli.

Injini kaphethroli ifuqa amandla angu-185 kW ne-torque engu-370 Nm. Ngebanga lika100 km isebenzisa amalitha kaphethroli angu-6.8 kodwa mina ngesikhathi ngihamba ngayo ibidla ngaphezulu kwayisikhombisa ngebanga elifanayo.

Ukusuka ku-0 iye ku-100km/h bathi kuyithatha imizuzwana engu-6.3. Njengomuntu oke wahamba ngekadizili phambilini, uma ungumuntu ofuna amandla athe xaxa ekaphethroli yiyona okumele uyithenge njengoba ngikubalulile ngenhla ukuthi iphethe u-185 kW. Ngakolunye uhlangothi ekadizili yona ino-140 kW.

Amandla ayo ezwakala ngokuthi uma unyathela amafutha isuke ngokushesha kodwa ngokwami ekadizili ikahle ngoba iyonga ikakhulukazi ngoba inani likaphethroli lilokhu liqhubekile nokukhuphuka. Futhi ke u-140 kW ngokwami ngamandla enele emotweni yomndeni.

Umehluko usenjinini phakathi kwekadizili nekaphethroli kodwa indlela ebukeka ngayo iyafana.

Le moto ithule ngaphakathi futhi uma uthanda uyigaxa i-air suspension eyenza ukuthi ibe ntofontofo futhi ingazweli emabhampini.

Ngaphakathi ine-screen esingu-8.3 inch lapho uxhuma khona iselula yakho nge-Apple CarPlay noma i-Android Auto bese iselula ivela kwi-screen.

Lapho ucingo uliphendula ngebhathini esiteringini, imiyalezo ikufundele bese uyayitshela ukuthi iphendule ithini futhi nomculo okwi-phone iyawudlala.

Umshayeli une-Audi virtual cockpit engu-12.3 inch evele iveze yonke into phambi komshayeli ukuze engalokhu ebuka emaceleni. Iveza inkombandlela, speedometre nokunye.

Okokusiza umshayeli kuhlanganisa ukuthi uma ukhanyisile ngo-bright ebusuku kuthi uma sekuqhamuka enye imoto izicime iphinde ikhanyise kakhulu uma ingasekho.

ISport, okuyiso ebesihamba ngaso siphuma namarimu angu-18 inch, Aluminium door sill trim, bumpers in full paint finish, High gloss package, Interior inlays with aluminium, LED headlights, Line specific radiator grille, Line specific rear diffuser and air intakes, Sport seats neSteering wheel with chrome.

Le moto edonsa ngawo wonke amasondo ngosizo lweQuattro ukuphakama kwayo kungu-1.66 metres. Ubude bayo bungu-4.66 metres kuthi ububanzi bayo bube ngu-.189 metres. Ukuvuleka kwayo kwenza abagibeli abahlanu bahlale ngokukhululeka. Ebhuthini isikhala singu-610 litres kanti uma ulalise izihlalo zangemuva kuba ngu-1 550 litres. Khona ebhuthini inebhathini lokukhipha i-towbar uma udonsa inqola.

Inobuchwepheshe obubizwa ngequattro on demand obenza ukuthi ingadonsi ngamasondo angemuva uma ingasiboni isidingo kodwa uma sivela, amandla iwafaka emasondweni adingeka kuwo ngokushesha.

Umshayeli unebhathini lakhe le-Audi drive select lapho ekhetha khona ukuthi ufuna ihambe kanjani. Kukhona u-Off Road, Efficiency, Comfort, Auto, Dynamic no-Individual.

Engikuqaphelile kuyo wukuthi uma izwa ngathi ikhona ojika kulo ngesivinini liyakuchhitha, inciphisa yona ijubane kube ngathi ibopha amasondo ukuze ingagingqiki. Inani Q5 2.0 TFSI quattro S tronic: R 747 500

Q5 2.0 TFSI quattro S tronic Sport: R 797 500

Iphuma ne-Audi Freeway Plan yeminyaka emihlanu noma ibanga lika-100 000km.