Imidlalo ezojabulelwa abamnyama
UKUGQOZA kwabashayeli bezimoto zomjaho abamnyama kwenze ukuthi inkampani iRoam Construction & Projects isungule umcimbi wokushayela amaGo-cart, iTownshop Go-Carting Experience ngenhloso yokufaka indlu emnyama kulo mdlalo.
Umnikazi weRoam Construction & Projects, uMnuz Londa Nkosi, uthe umcimbi wokuqala uzoba ngoNovemba 24, 25 uze usongwe ngoNovemba 25 eCentrum Park ngaseWorkshop enkabeni yeTheku.
Uthe le midlalo basawethula kubantu abamnyama.
“Inhloso yethu wukuwethula emalokishini nasemakhaya. Njengoba siwenzela eThekwini nje yingoba sifuna ukuwethula ukuze abantu bawazi.
“Kuzothi uma kuqala unyaka ozayo bese zihambela izindawo ezahlukene emakhaya naselokishini.
“Abantu esizobe sidlala nabo kulezi zindawo sizobathatha bazoncintisana futhi eThekwini ekupheleni konyaka,” kusho uNkosi.
Uthe abashayeli asebephumelele iningi labo liqala ngokudlala ama go-cart ngaphambi kokushayela izimoto zomjaho.
“Sifuna ukuthola iGugu Zulu bakusasa ngoba indlu emnyama ayikho kakhulu emdlalweni wezimoto. Siqala kancane ngethemba lokundlondlobala ngokuhamba kwesikhathi,” kuchaza uNkosi.
Uthe lo mdlalo uzosiza ekutheni nabantu abasha bayeke ukudla izidakamizwa kodwa kube khona into abaqeda ngayo isithukuthezi futhi abangaziphilisa ngayo ngomuso.
UNkosi uthe ngoNovemba 24 bazoqala ngo-10 ekuseni kuze kube wu-5 ntambama.
Ngezinsuku ezimbili ezilandelayo bazoqala ngo-9 kuze kube wu-6 ntambama.
Uthe abantu abazobuka bazongena mahhala kodwa labo abafuna ukudlala bazokhokha uR35.