Bamtinyele uKhune ngesithombe etamasile
UZITHINTELE iziqanda ukaputeni weKaizer Chiefs, u-Itumeleng Khune, oshuthe isithombe eqhiphotheke endaweni yokudlela wasifaka ku-twitter ezincoma indlela abukeka ngayo.
UKhune ubebukeka ezipholele, eziphihle ngezibuko ezimnyama.
Uzithole esebhekana nolaka lwabalandeli abebemgxeka ngokungabi nandaba nokwenzeke ngoMgqibelo ntambama.
IChiefs ihlulwe yiBidvest Wits ngo 1-0 emdlalweni owandulela owamanqamu weTelkom Knockout eBidvest Stadium. Lokhu kusho ukuthi Amakhosi aphunyukwe ngenye indebe kule sizini. Yisizini yesithathu iChiefs ingawini neyokubika indebe inomqeqeshi uSteve Komphela.
UKhune uqalwe nguThabani Mvubu @thabani_mvubu obhale ukuthi: “Eminyakeni edlule wawungeke ubone umdlali egcwele ezinkundleni zokuxhumana emuva kokuhlulwa emdlalweni, uMoeneeb Joseph wayeqinisile.”
UKhune usheshe waziphendulela ethi: “Angiyena mina (uJosephs) kodwa.”
Ngesizini edlule uJosephs, ongunozinti weWits, washiya angalazi kubadlali be-Orlando Pirates ebabiza ngabadlali bezinkundla zokuxhumana.
UKhune akabange esaphendula ngesikhathi abanye bezitapela kuyena. Nakuba bebekhona abambalwa abebekade behambisana naye kodwa iningi likhiphele ulaka kuye. U-Good news @good_news100 uthe: “Ngicabanga ukuthi kufanele ushiye izinkundla zokuxhumana okwesikhashana, ugxile emsebenzini, yilokho esikudingayo Pah!” UThabang Marumo @ thabangmarumo68 ubhale ukuthi: “Ukubukeka kwakho yikhona okubalulekile kune #TKO2017... asibhiyozele ukubukeka kwakho mngani. Okungenani kukhona esingakubhiyozela kule sizini.” U-Monwanise @ OnwabaMonwabise uzamile ukubhulela uKhune umlilo: “Kugxekwa @IIKHUNE_32_16 ngento engekho. Umuntu okufanele agxekwe uMeyiwa noKomphela ngokugcina uTshabalala ekubeni engakhombisi mfutho. NgiyiPirates kodwa u-Itu uyena ophambili kimina.”
Toxic-Touch• @Thokozani_ MM uthe:” Sihluliwe izolo futhi kusebuhlungu uma kuwukuthi kade ungazi.”
UKhune akaqali ukuzithola esephendulana nabalandeli. NgoMeyi waziphendulela egxekwa emuva kokuthi engenelwe yigoli ngomzuzu ka-94 bebhekene neLamontville Golden Arrows emdlalweni owaphela ngo 1-1.
Wayebhale ukuthi: Ngendlela engihlaselwa ngayo ngabantu ngathi ngingena enkundleni ukuyodlisa iqembu kanti nginikeza u-100% uma kungewona u-200% kuyona yonke imidlalo.”
UKhune wabuye waxolisa ngendlela akhuluma ngayo ezeseka ngokuthi ucasulwe yindlela abanye babalandeli abakhulume ngayo.