‘Ukhunyuliswe’ yikhansela esolwa ngokweba eyesifo
UKHALA ngokwehliswa isithunzi owesifazane wase-Adams Mission, othi ukhunyuliswe yikhansela lesifazane wasala ngezimpahla zangaphansi, limsola ngokweba imali yesifo.
UNksz Gugu Radebe (35), othi uhlazeke phambi kwamalungu omphakathi kulesi sigameko esenzeke ngeSonto eledlule, uvule icala kanye nodadewabo uNkk Xolisile Mothupi oshayiwe. Uthe bebejwayelene nekhansela uNkk Khosi Mbhele, athi uke waba ngumsizi walo ehhovisi.
UNksz Radebe uthe walandwa yimoto yekhansela namanye amalungu omphakathi, kuyiwa emhlanganweni wamagatsha.
Isigameko kuthiwa senzeke ngezithuba zabo 10 ebusuku sekubuywa emhlanganweni. UNksz Radebe uthe izinsolo zokweba zivezwe ngowesilisa ambize ngoDeon, osekomitini lewadi.
“Ngangigqoke ingubo nesikibha ngaphezulu. Ngesikhathi ikhansela lingikhumula, bekunemoto engikhanyise ngamalambu. Ngiseshwe ngaphansi kukabhodisi, ngenhlanhla ngangigqoke ithaythi, umama ukhansela wafaka isandla ebheka ukuthi imali angiyifihlanga yini ngaphansi,” kusho uNksz Radebe.
Uthe lesi senzo simhlukumezile futhi uyamangala ngoba bebezwana nekhansela kusukela ngonyaka odlule, likhankasela ukhetho.
UNkk Mothupi uthe wayegcine uNksz Radebe eya emhlanganweni, waxakeka esengqongqozelwa ebusuku etshelwa ukuthi usolwa ngokweba.
UNkk Mothupi uthe waphuma egqoke izingubo zokulala, waya endaweni yesigameko.
“Ngifice uGugu esesixukwini. Icala lami kwaba wukubiza uDeon ngomfana, okuthiwa nguye osole uGugu ngokweba. Weza kimina esevutha, wangishaya ngempama ephindelela. Ikhansela alizange likhuze,” kusho uNkk Mothupi.
Ngaphandle kokuvula amacala emaphoyiseni, uNkk Mothupi uthe udaba uludlulisele ebuholini be-ANC eThekwini.
“Ngaya emahhovisi e-ANC kwathiwa uNobhala uBheki Ntuli usemhlanganweni. Uze wangishayela ucingo ngoLwesine ethi akahlangene nokuqondiswa kobugwegwe emakhanseleni. Ngiyalelwe ukuthi ngibhalele uMapena (uSomlomo weTheku) incwadi, okuthiwe uzobuya ngoMsombuluko (namuhla) phesheya. Laba besifazane bathi bebelinde ukuthi ikhansela lizoxolisa. Okhulumela amaphoyisa KwaZuluNatal uLiet-Colonel Thulani Zwane, uthe kuvulwe icala lokushaya nelokwehliswa isithunzi KwaMakhutha. UNkk Mbhele uphikile ukuthi wamkhumula uNksz Radebe wathi waziphakamisela izingubo kuthiwa abaseshwe ababesemotweni. Uphikile nokuthi udadewabo washaywa wathi nguyena owabamba ngesidlozana uDeon. “Imali elahlekile ikhishelwe emndenini oshonelwe wumkhandlu. Nami ngimvulele icala lokweba uGugu ngoba ngitshelwe yindodakazi yami ukuthi wacela isikhwama efuna uvaselina,” kusho uNkk Mbhele. UNtuli uvumile ukuthi ubikelwe ngalolu daba.