Bazibona besengozini yokubulawa abangani bakaMagaqa
BAZIBONA bengaphephile emuva kokukhuluma ngokwaholela ekubulaweni kowayenguNobhala we-ANC Youth League, uMnuz Sindiso Magaqa ( osesithombeni).
Abangani abakhuluma emngcwabeni kaMagaqa, oMnuz Less Stuta noMnuz Thabo Zulu bathi bebesatshiswa phambilini ngenxa yolwazi abebenalo okukhona kulo abalunikwa nguMagaqa kodwa lesi simo sesidlulele emuva kwezinkulumo zabo ngokufa kwakhe.
UZulu wageqa amagula ngenkohlakalo koMasipala baseHarry Gwala kwiKhomishini kaMoerane ephenya ngokubulawa kwabezepolitiki. UZulu wakusho esidlangalaleni ukuthi ukholwa wukuthi uMagaqa owayeyikhansela eliyi-PR ngesikhathi ehlaselwa, wabulawa ngenxa yokudalula izenzo zenkohlakalo ezazenziwa eMzimkhulu.
Uthe kumanje uvame ukubona izimoto ezisolisayo zipake ngaphandle kwakwakhe.
“Angisahlali endaweni eyodwa ngenxa yaso lesi simo. Impilo yami beyivele isengcupheni kodwa manje sekuthanda ukuba bucayi. Mina noLess (esho uStuta) sike sithole imiyalezo evela ophikweni lweCrime Intelligence besexwayisa ukuthi asingaphumeli phandle ngoba kunezinsolo zokuthi sizobulawa. Sihlala sizigqume ezindlini. Angisakwazi nokuphuma ngiye ezitolo noma ngiphume ngiyozijabulisa njengabo bonke abantu benza,” kusho uZulu.
Uthe okubakhathazayo wukuthi akukho okwenziwayo ukubavikela. Uveze ukuthi wakubika ku-Adv Marumo Moerane ngo-Okthoba nonyaka ukuthi ubona esengozini, wathembisa ukuthi kukhona okuzokwenziwa. Ngokusho kwakhe kuze kube manje usalinde ukuthola usizo. Uthe baningi abantu abebefuna ukufakaza kodwa asebehlehle nyova ngenxa yokungathathelwa phezulu kwendaba yokungaphephi kwabo.
UStuta uthe emzini wakhe oseKokstad kusanda kufika abantu abanqamule uthango. Kwenzeka lokhu nje naye ukhala ngezimoto ezimlandelayo uma eseKokstad noma eseMzimkhulu. Uthe lesi simo sesiholele nasekutheni ozakwabo asebenza nabo eMzimkhulu babe novalo uma esehhovisi njengoba ethe lezi zimoto okukholakala ukuthi ngezezinkabi zivele zithushuke.
Uthe ngisho izingane zakhe akahambi nazo emotweni ngenxa yobungozi. UStuta uthe akazisoli ngezinkulumo zakhe yize impilo yakhe isengcupheni. “Ukube ngathula wawuzongilahla unembeza wami. UMagaqa ubefana nomfowethu, besikhuluma yonke into naye, ngisho izinto ezithinta impilo yethu yangasese. Bengingeke ngikhululeke emoyeni uma ngithula,” kusho uStuta.
UBrigadier Hangwani Mulaudzi, okhulumela oKlebe, uthe uStuta noZulu kufanele bafake isicelo sokuvikelwa. Uthe bayazwelana nabo ngesimo ababhekana naso kodwa wathi kunohlelo olulandelwayo ukuze abantu bathole ukuvikelwa.
Ingqapheli yodlame KwaZulu-Natal uNkk Mary de Haas izwakalise ukukhathazeka ngokuphepha kwalaba. uNkk De Haas uthe usebikele iziphathimandla ezahlukene ngengozi abazibeka kuyo abaletha ubufakazi kuleya khomishini.
UMnuz Solo Mdledle ongunobhala wekhomishini kaMoerane akazange atholakale ukuthi aphawule.