UNgoye enkingeni ngeziqu zomthetho
ISENKINGENI inyuvesi yaseZululand, oNgoye, ngokuthi ingase ilahlekelwe yilungelo lokufundisa iziqu zomthetho njengoba umbiko wesikhashana we-Council on Higher Education (CHE) uveza ukuthi ibalwa kumanyuvesi amathathu angase aphucwe leli lungelo.
Umbiko uthi amanyuvesi amathathu – eyaseLimpopo, Kapa ne-Unizulu – aseyalelwe ukuthi ahlangabezane nemibandela ye-CHE ngoMeyi wonyaka ozayo noma aphucwe ilungelo lokufundisa iziqu.
Amanyuvesi kuthiwa kudingeka ukuthi achazele umkhandlu ukuthi kungani kumele aqhubeke afundise iziqu zomthetho alethe nohlelo olubuyekeziwe.
Okhulumela uNgoye, uNksz Gcina Nhleko, uthe inyuvesi izokhipha isitatimende ngalokhu.
Inyuvesi yaKwaZulu-Natal, ikhiphe isitatimende ithi lo mkhandlu uyinike imvume yokuqhubeka ifundise iziqu zomthetho iBachelor of Laws (LLB).
Sithe le nyuvesi ingeyesithathu kwawu-17 efundisa lezi ziqu.
Umphathi wayo, uDkt Albert van Jaarsveld, uthe bajabule ngokuthola izindaba ezinhle zokuthi inyuvesi iqhubeke ifundise iziqu.
“Wumphumela omuhle otshengisa ukuthi sikhiqiza iziqu ezisezingeni zomthetho ezweni,” kusho uVan Jaarsveld. Uthe umkhankaso we-CHE ubuhlanganisa nezinye izinhlaka zezomthetho okubalwa kuzo iSouth African Law Deans Association (SALDA), i-General Bar Council neLaw Society of South Africa ukuze kuqiniswe ukufundiswa kwezomthetho emanyuvesi akuleli. Uthe i-CHE ibifune kuthi kulethwe izinhlelo ezibuyekeziwe zokuqinisa kakhulu kulo mkhakha wezomthetho kuwona wonke amanyuvesi.
Ibamba le-Dean kwezomthetho e-UKZN, uSolwazi Warren Freedman, uthe bazibophezele ekutheni bazoqinisekisa ukuthi iziqu zomthetho zisezingeni.
“Siyajabula ngemiphumela, sihalalisela abafundi nabasebenzi. Sibonge nalabo ababamba iqhaza endabeni yokubuyekezwa kweziqu.”
Ishayelwa ucingo i-CHE kuthiwe isikhulu esiphezulu uSolwazi Narend Baijnath, okhuluma nabezindaba, singaphandle kwezwe sizobuya maphakathi nesonto.
Isitatimende esikhishwe yinyuvesi yaseKapa sithe inyuvesi ikhathazekile ngombiko wesikhashana we-CHE mayelana neziqu.
Sithe uhlelo lokuhlola iziqu belungolokuqala. Kungenzeka inyuvesi iphucwe ilungelo lokufundisa lezi ziqu uma ingahlangabezani nemibandela ethile.
USolwazi Penelope Andrews, ophethe izifundo zomthetho eKapa uthe bayaziwa ngokuba yinyuvesi ekhiqiza abafundi abasezingeni eliphezulu.
Uthe ngo-2014 bakleliswa baba ngunombolo 40 emhlabeni jikelele uma kuziwa ezikhungweni ezifundisa ezomthetho.
“Sizohambisa iziphakamiso ezibuyekeziwe emasontweni ambalwa ezayo.”