Babanjiwe ‘ababulale’ iphoyisa
BABOSHWE sebecashe Esikhaleni abasolwa ababili okukholakala ukuthi babulale iphoyisa Eshowe ngoLwesithathu. ULt-Col Thulani Zwane uthe abasolwa batholwe nezibhamu ezimbili, esincane nesikhulu i-R5, basolwa ngokubulala uConstable Jabulani Mavundla obesebenza esiteshini samaphoyisa esiseMbongolwane, eduze kwaseShowe. Abasolwa abaneminyaka ephakathi kuka-21 no-22 bazovela maduze enkantolo yeMantshi yaseShowe lapho bebhekene necala lokubulala, elokuzama ukubulala nelokuduna. UZwane uthe uMavundla nozakwabo babebuya kosiza abantu ababedunwa eMaqhogo ngesikhathi behlaselwa yizigebengu ezavulela inhlamvu.
“UConstable Mavundla wadubuleka wase ehluleka wukulawula imoto yayoshayisa izihlahla. Washonela endaweni yesigameko kanti uzakwabo uyelashwa esibhedlela. Izigebengu zathatha isibhamu sikaConstable Mavundla ngaphambi kokubaleka,” kusho uZwane.
UKhomishana wamaphoyisa KwaZuluNatal osabambile uMajor Genetal Bheki Langa uwashayele ihlombe amaphoyisa abophe abasolwa baseSikhaleni wathi kuthumela umyalezo wokuthi aphelile amahlathi okucasha ezigebengwini ngoba bazoqhubeka nokuzithungatha ukuze zijeze ngamacala azo.
Khona manjalo uboshwe esecashe esibhedlela owesilisa osolwa ngokudubulana namaphoyisa eNanda ngoLwesihlanu.
Le ndoda kuthiwa ibiyingxenye yamadoda ayisikhombisa azame ukubamba inkunzi eNanda abhadanywa amaphoyisa kwase kudutshulwana.
Amaphoyisa amabili ayalashwa esibhedlela kanti umsolwa uboshwe esecashe esibhedlela Osindisweni.
Abanye abasolwa abayisikhombisa basagcwele amathafa. Belaxaze imoto abebehamba ngayo ngosuku lwesigameko ePhoenix.
Umsolwa osesibhedlela uqashwe ngamaphoyisa. Uzobingelela imantshi enkantolo yaseNtuzuma ngecala lokuzama ukubulala uma eseluleme.