Kuzocaca namuhla ngesinqumo sikaMugabe
KUZOCACA namhlanje emini ukuthi umengameli waseZimbabwe uMnuz Robert Mugabe uyazehlela esikhundleni noma uzoketulwa ngumbutho wamasosha emuva kokuxoshwa yisigungu esiphezulu seZanu-PF.
Izindaba zokuxoshwa kukaMugabe kwiZanu-PF zimenyezelwe nguNgqongqoshe wezokuPhepha eZimbabwe, uMnuz Patrick Chinamasa esithangamini sabezindaba ebesisakazwa bukhoma kwi-eNCA nakwezinye iziteshi zezindaba.
UChinamasa uthe isikhundla sikaMugabe sizothathwa nguMnuz Emmerson Mnangagwa obeyiphini likaMugabe alixoshe ngenyanga edlule.
UMnangagwa ubuyiselwe kwiZanu-PF kwase kuxoshwa uMugabe nasondelene nabo.
Uthe baphinde baxosha noNkk Grace Mugabe obegaqele isikhundla sokwengamela iZanuPF.
“UMugabe unikezwe kuze kube ngu-12 emini namhlanje ukuthi azehlele esikhundleni. Uma engehli sizophoqeleka ukuthi sisebenzise indluzula ukumsusa,” kusho uChinamasa.
Kushone elayizolo kuthiwa uMugabe usaxoxa nabasemandleni ukuthi uma esula esikhundleni uzoshonaphi njengoba ekhonjwa eDubai, Singapore naseNingizimu Afrika.
Kuphinde kwaxoshwa uMnuz Jonathan Moyo, uMnuz Savior Kasukuwere oyiNational Political Commissar, umshana kaMugabe uMnuz Patrick Zhuwao, uNobhala weZanu-PF uMnuz Ignatius Chombo nabanye abebeseka uNkk Grace Mugabe emkhankasweni wokungena esikhundleni somyeni wakhe ababizwa nge-G40.
UMnangagwa oteketiswa ngokuthi yi-The Crocodile okusho ukuthi “Ingwenya” ubonakala njengomuntu ozoletha uzinzo emnothweni waseZimbabwe.
NgoMgqibelo izinkumbi zabantu bezimasha enhlokodolobha yaseZimbabwe iHarare zicula ukuthi sezikhululekile zanga namasosha ezikholwa wukuthi yiwona azokhipha uMugabe esikhundleni.
Ukuvukelwa kombuso kaMugabe kumangaze abaningi kwazise baningi abaholi abaqhoqhobele izikhundla kusukela kumengameli waseUganda uMnuz Yoweri Museveni nowaseDemocratic Republic uMnuz Joseph Kabila.
UMugabe selokhu aphatha eZimbabwe kusuka ngo-1980 emuva kokuthi izwe lithole inkululeko kwiBritain.