Imibono yentsha ngezinkinga zayo
NAMHLANJE njengoba kuwusuku lokuhlonipha izingane emhlabeni, i-Universal Children’s Day, Isolezwe likhulume nentsha yaKwaMashu, eThekwini, ebeke imibono yayo ngezinye izinkinga ezibhekene neNingizimu Afrika. Intsha, okunguNomcebo Nxumalo (17), Mxolisi Gumede (17), Monde Ndelu (19) no-Asanda Radebe ixoxe nentatheli yeSolezwe uMCEBO MPUNGOSE. ISIDINGO SEMFUNDO YAMAHHALA
UMonde Ndelu uzishayele ihlombe izincomo eziphakanyiswe embikweni wekhomishini ngemfundo yamahhala ophume ngesonto eledlule. Phakathi kwezincomo kwaphakanyiswa ukuthi mayibe mahhala imfundo kumaTVET bese kuthi emanyuvesi kungabe kusabhaliselwa ukufunda futhi abafundi bathole uxhaso lokufunda ngemali mboleko.
“Okwamanje lezi ziphakamiso ngibona kuyizo ezingaphumelela. Ukufunda mahhala emaTVET kuzokwandisa abantu abanamakhono adingekayo ezimbonini eziyinsika yomnotho. . Sidinga ithuba lokufunda sithole ulwazi esiludingayo.” INKINGA YOPHUZO OLUDAKAYO ENTSHENI
Bephawula ngokuphuza kwentsha bavumelane ngokuthi akusolwe abadala ababukela kubo emphakathini.
“Ngenze isibonelo nje, uzothi ukhula ubone ubaba wakho ephuza ngenxa yezinkinga abhekene nazo ekhaya, nawe uzokhula wazi ukuthi uphuzo oludakayo iyona ndlela yokudambisa ubuhlungu bezinkinga osuke ubhekene nazo,” kusho uMxolisi.
U-Asanda uthe enye intsha iphuza kangaka nje ngenxa yengcindezi evela kubangani. KUNGANI INTSHA INGATHANDI UKUFUNDA?
Kuhlezi kunesikhalo sokuthi intsha ayizifundi izincwadi ngokwanele. Ephawula ngalokhu uNomcebo uthe inkinga yokuqala ababhekana nayo ukungabibikho kwezindawo zomtapo wolwazi.
“Ukufunda yinto okumele uyijwayele kusukela usemncane. Kumele kube khona izindawo zomphakathi eziseduzane nathi esingakwazi ukuya kuzo siyofunda. Uma indawo yokufunda ikude akulula ukuzigqugquzela ukuthi uye kuyo.Uma umtapo wolwazi usesigcemeni esikude nami kunzima ukuzihlupha ngokuya kuwo,” kusho uNomcebo.
U-Asanda uthe kumele abazali bajwayeze izingane ukufunda ezinye izincwadi ngendlela ecishe ifane nabafundiswa ngayo iBhayibheli ekhaya.
UMonde uthe uqale ukuzixaka ngokufunda ebona ukuthi kunezindaba ezishicilelwa kuFacebook.