Sidinga isisombululo kolwemfundo yamahhala
SEKUPHELE iminyaka engaphezu kwemibili umkhankaso olwa nemali ekhokhwa ezikhungweni zemfundo ephakeme owaziwa nge#FeesMustFall uzama ukuqhakambisa ubunzima abafundi ababhekana nabo ukuze bathole imfundo ephakeme.
Indlala ibhokile emanyuvesi kanti kukhona ngisho nocwaningo oluveza ukuthi abanye abafundi bagcina bedayisa ngomzimba benzela ukulala bedlile.
Kunabafundi abaphila kanzima kanjena nje sizwa mihla namalanga ukuthi imali imoshwa kangakanani ezweni lethu ngenkohlakalo. Yingakho nje kujabhisa ukuzwa ukuthi ikhomishini kaHeher ebiphenya ngokuthi izwe lingakwazi yini ukufundisa abafundi bezikhungo zemfundo ephakeme mahhala ithe yinto engakezukwenzeka lena.
Ijaji Jonathan Heher obesizwa ngu-Advocate Gregory Ally noNksz Leah Khumalo embikweni abawethule ngoMsombuluko odlule bathe imfundo kumele ikhokhelwe ngokubambisana kusetshenziswa indlela ezofaka uhulumeni namabhange.
Umbiko uphakamisa ukuthi abafundi abafunda emakolishi aqeqesha amakhono (TVET Colleges) yibona okumele bafunde mahhala. Abanye bazothi yinto enhle lena ngoba ayashoda amakhono ezweni.
Nokho uma sigcina siphasile lesi siphakamiso kufanele kugadwe kungagcini ngokuthi wonke umfundi afudukele kula makolishi ngoba efuna imfundo yamahhala nokuyothi ngokuhamba kwesikhathi kushode emikhakheni efundelwa emanyuvesi. Okunye okuyofanele kuhambisane nalokhu yinto esikhulunywe iminyaka ngezinga lemfundo yama-TVET ngoba iyakhalisa indlela okwenzeka ngayo njengoba esephenduke indawo yabafundi abasuke bengaphasanga kahle.
Ezinye iziphakamiso zekhomishini zithi kufanele kushintshwe uNSFAS ngohlelo lokuboleka imali emabhange izikweleti zakhona ezizobanjwa uhulumeni. Lokhu akubonakali ukuthi kuzobasiza kanjani abafundi abahlwempu ngoba amabhange asebenza ngenzalo enkulu kabi nokuzosho ukuthi abafundi bazocwila ezikweletini bengakaqali nokusebenza.
Sinxusa zonke izinhlaka ezithintekayo ziphinde zixoxe ukuze kugcine kutholakale isisombululo esizokwenza lifezeke iphupho lokuthi abahlwempu bafunde mahhala.