Izinto ezimqoka okumele abathengi baziqaphele
EZABATHENGI
KUBALULEKILE ukuthi sifundisise izinkontileka zemishwalense ngaphambi kokusayina. Ezabathengi zithole ucingo kowesifazane wasoLundi oshonelwe ngumalume wakhe, umshwalense wanqaba ukukhokha. Ngeke silidalule igama lakhe ngenxa yokuthi umalume wakhe akakhokhelwanga imali eseshonile ngoba wangena emshwalenseni enesifo esithile.
Ezabathengi zithole ukuthi owesifazane ubhalise umshwalense ngoDisemba ngonyaka odlule, efomini alisayina kubhaliwe ukuthi umuntu oshona engaguliswanga yisifo esithile ukhokhelwa uma esebe yilungu lomshwalense izinyanga eziyisithupha kanti obulawa yisifo esisondelene neHIV/AIDS ukhokhelwa uma esebe yilungu lomshwalense izinyanga ezingu-12.
AbakwaThe Unlimited, umshwalense wowesifazane, bathe ubazise ukuthi ushonelwe ngumalume ngo-Okthoba 23 wathumela imininingwane engaphelele bamcela ukuthi afake namaphepha asesibhedlela azochaza ngembangela yokufa. Amaphepha asesibhedlela afike kwabakwaThe Unlimited ngoNovemba 9 bawadlulisela kudokotela ozimele othole ukuthi umufi uthathwe yisifo esibizwa ngeDilated Cardiomyopathy sokuvuvukala kwenhliziyo. Bathe bathole ukuthi umalume wowesifazane ubaziwa ukuthi unalesi sifo ngoFebhuwari 2016 njengoba eke walaliswa esibhedlela.
Lokhu kusho ukuthi isifo sakhe besaziwa ukuthi sikhona ngaphambi kokuthi afakwe kumshwalense womshana wakhe okwenze inkampani ingakhokhi ngoba wayengayitshelanga. UNkk Carole Johnson oyiDigital Lead eThe Unlimited uthe owesifazane wazisiwe ngezizathu eziholele ekutheni angakhokhelwa wase ecela amakhasimende abo ukuthi afundisise izinkontileka ngaphambi kokusayina.
“Kukhona imibandela kumafomu ethu ngakho sicela abantu bayifundisise futhi uma kukhona lapho bengacaciselekanga khona babuze ukuze sibacacisele,” kusho uNkk Johnson. Ebuzwa ukuthi kuthatha isikhathi esingakanani ukukhokha uma ikhasimende libazisa ukuthi kunoshonile uthe kuthatha amahora angu-24 uma sebethole imininingwane efanele.
Siphinde sathola imibuzo kuMnuz Zwelakhe Ngubane noMnuz Dumisani Khanyile baseMgungundlovu abakhala ngokuthi abakhokhelwanga imali ye-Unemployment Insurance Fund (UIF)
UMnuz Lungelo Mkamba obhekele ezokuxhumana eMnyangweni wezabaSebenzi KwaZulu-Natal uthe uNgubane noKhanyile bafaka isicelo se-UIF ngonyaka odlule emuva kokuxoshwa emsebenzini. Bakhokhelwa ngokugcwele kodwa okubakhalisayo wukuthi bathole imali encane ngoba owayebaqashile uthe basebenza unyaka esikhundleni seminyaka eyisithupha. Uthe uMnyango wezabaSebenzi uvulele umqashi icala ngoJulayi kanti balinde usuku lokuya enkantolo.
UMnuz Mziwenkosi Maduna naye ukhalele Ezabathengi ngokuthi akayitholi i-UIF yakhe kodwa kuthe uma kuphenywa kwatholakala ukuthi wayevulele umqashi icala emuva kokuthi wayengamholelanga. UMkamba uthe uMnyango wezabaSebenzi eVerulam uvulele umqashi kaMaduna icala elisaphenywa. Uma etholwa enecala lokungayilandeli imithetho yabasebenzi uzoshushiswa. UNksz Thembisa Qongama ukhale ngokuthi akayitholile imali ye-UIF emahhovisi oMnyango wezabaSebenzi osePinetown. UMkamba umcele ukuthi athumele imininingwane yakhe yasebhange ukuze athole imali yakhe. Ugqugquzele bonke abasebenzi ukuthi bathumele imininingwane efanele futhi uma benezinkinga bathinte abasebenzi boMnyango wezabaSebenzi ngoba bayazixazulula izinkinga zabasebenzi.
UNksz Refiloe Mokoena waseClermont ucele usizo ngomshwalense ongafuni ukumkhokhela emuva kokuthi izigebengu zisebenzise “ivimba” okuwumshini owenza imoto ingakhiyeki zizama ukuyeba.
“Ngenhlanhla imoto ayebiwanga kodwa ilimele. Uma ngithi izigebengu bezisebenzise ‘ivimba’ bangitshele ukuthi yimina engingenzanga isiqiniseko sokuthi ngiyikhiyile banqaba ukungikhokhela,” kusho uNksz Mokoena. Ezabathengi zibhalele umshwalense kaNksz Mokoena othe ucela athumele i-video efakazela akushoyo waqinisekisa ukuthi uzomkhokhela uma usuyitholile.
Ezabathengi zithanda ukuxwayisa abantu ngokuthi ababuze imishwalense yabo yezimoto ukuthi iyakhokha yini uma izimoto zidunwe kusetshenziswa ivimba ngoba izinkampani eziningi njengeFirst For Women, King Price nezinye ziyakhokha uma imoto yebiwe noma ilimale kusetshenziswa ivimba. Noma kunjalo abathengi mabaqinisekise ukuthi izimoto zikhiyekile bangagcini ngokuciphiza amabhathini kokhiye kodwa bavule izicabha ukuqinisekisa ukuthi zikhiyekile.
Abanezinkinga ezidinga ingosi yezabathengi bangathumela i-email enayo yonke imininingwane kwiemail kaboniswa.mohale@ inl.co.za noma basishayele ku-0313082743.