Ngididwa eyokusebenza kongqongqoshe
MHLELI: Ngicela ukucaciseleka ngokusebenza kongqongqoshe kuhulumeni.
Kusangena uhulumeni wentando yabantu ngangicabanga ukuthi ungqongqoshe ufakwa enyangweni ohambisana nakufundele noma ake wasebenza ngakho kodwa kwahamba ngabona ukuthi akuhambi kanjalo . iningi labo lithembela kwabasuke beqashwe wumnyango ngokwamakhono abawafundele. Ngangithi ungqongqoshe uzoba yisandla esizodlulisela okwathenjiswa yiqembu ngesikhathi sokukhetha uhulumeni. Ongqongqoshe basebenza ngokuthanda.
Lapha ngizobala abambalwa asebenze ezinto ezixakayo. Ungqongqoshe owaphatha uMnyango wezeMfundo owangenisa imfundo owayiqamba ngokuthi yi-curriculum 2005. Lolu shintsho alubanga nazithelo ezibonakalayo. Eminyakeni eyisihlanu elandelayo kwangena uMnuz Kada Asmal wafaka olwakhe. Kwaba sengathi uthunywe ukubulala umgogodla wama-Afrika aphumelelayo. Izikhungo zokufundela ubuthisha zavalwa.
Kuncishiswe isibalo samaphoyisa aqeqeshwayo, kwezempilo kwancishiswa esabahlengikazi.
Ongqongqoshe kufanele bafeze okwakuthenjiswe abavoti. Ubezwa sebethi bayobuza abantu ukuthi badingani bese ngidideka ukuthi kanti babebathembiseni. Ungqongqoshe kufanele alandele umgomo weqembu, bese uMengameli ebheka ukuthi imigomo iyalandelwa.
Ukuze uphumelele uhulumeni kufanele usebenzise inqubo yokuphathwa kwezinkampani ezizimele lapho kusuke kunomuntu obheka ukuthi wonke umuntu wenza akuqashelwe.