Isexwayiso sikaMbeki kuhlangene omakadebona
OWAYENGUMENGAMELI waseNingizimu Afrika, uMnuz Thabo Mbeki, uthe i-ANC idinga ukuhlengwa ekusetshenzisweni yidlanzana elithile.
“I-ANC isetshenziswa wuhlaka oluthile okusho ukuthi ayiseyona le ANC esiyaziyo,” kusho uMbeki.
Uthe i-ANC ibolile waxwayisa nangokuthi uma ingabalaleli omakadebona be-ANC izoduka kakhulu.
Ngempelasonto omakadebona be-ANC bebehlangene bedingida izinkinga zenhlangano futhi beza nezisombululo ekulahlekeni kwamavoti.
“Senzenjani ukususa i-ANC kwidlanzana elithile? Yini okumele siyenze ukulandela iziphakamiso zomakadebona?” kubuza uMbeki.
Uthe sekuyisikhathi sokuthi kwakhiwe i-ANC ngoba abaningi balahlekelwe yithemba.
Ingqungquthela yomakadebona be-ANC ebiseGoli ayihanjelwanga yisigungu esiphezulu sale nhlangano njengoba sithe izinkinga ze-ANC kufanele zixoxwe ngaphakathi hhayi esidlangalaleni.
Phakathi kwezihambeli bekukhona uMnuz Kgalema Motlanthe owayeyiphini likaMengameli Jacob Zuma, owayengungqongqoshe wezimali uMnuz Trevor Manuel, ilungu lesigungu esiphezulu se-ANC uMnuz Darek Hanekom nogaqele isikhundla sokwengamela i-ANC uNksz Lindiwe Sisulu.
UMbeki ubugxekile ubuholi be-ANC ngokuziqhelelanisa nomakadebona engqungqutheleni yabo yokubonisana.
“Ubuholi obuphezulu be-ANC buzenzele phansi ngokuqhelelana nomakadebona. Kuyacaca ukuthi ayikwazi ukuzilungisa i-ANC. Bekuyisinqumo esibi sokungahambeli umhlangano kodwa ngiyathemba ukuthi kukhona abaholi abakwaziyo ukucabanga esigungwini esiphezulu se-ANC,” kusho uMbeki.
Omakadebona baqhubekile bacela uMengameli Jacob Zuma ukuba ehle esikhundleni bathi ngeke bavume ukuthi i-ANC ife besaphila. Bathe bakhathazekile ngokuzitshwa kwemigomo ye-ANC okwenza kuxhashazwe imali ezinkampanini zikahulumeni nasePhalamende.
Bathe abaholi abaphethe abakwazi ukulwa nenkohlakalo.
Owayengungqongqoshe wezokuxhumana, uMnuz Sphiwe Nyanda, ubuze ukuthi kungani ubuholi be-ANC buziba omakadebona.