Ukhala ngokubanjiswa udonga yisibhedlela
OWESIFAZANE waseRichards Bay owalinyazwa wukufakwa kabi i-drip esibhedlela eRichards Bay, ukhala ngokuthi lesi sibhedlela sambambisa udonga.
UNksz Bongiwe Gumede uthe wangena kulesi sibhedlela eyobeletha ngo-2014 waphuma eselimele isandla ngenxa yokufakwa kabi i-drip.
“Ngesikhathi ngibika ukuthi isandla sivuvukele bayikhipha i-drip bayifaka kwesinye. Nami ngangicabanga ukuthi yinto encane. Inkinga yenzeka sengisekhaya, ukuvuvukala kungehli ngaze ngabuyela khona esibhedlela, isandla sesivuvukela kakhulu,” kusho uNksz Gumede.
Uthe udokotela wathi i-drip ingene kwi-tissue okungeyona kuzomele amunce amanzi. Sekwenziwe lokho uthi indawo eyayivuvukele yabukeka sengathi beyishile okwaphoqa ukuthi kukhikhilizwe inyama engaphezulu.
“Basika inyama ethangeni baphesha esandleni. Ngakhala ngokuthi bayabona yini ukuthi iphutha labo seliholele ekutheni ngibe nezibazi ezimbili ezingeke zisasuka nokuthi sengibuyele esibhedlela ngashiya ingane yami ebengisanda kuyibeletha ngephutha labo bathi bayaxolisa. Bathi ukukhombisa ukuthi bayalibona iphutha labo bazonginxephezela,” kusho uNksz Gumede.
Uthe bambhalela incwadi eqinisekisa ukuthi uzonxeshezelwa ngoR10 000 okumanje leyo mali akakaze ayithole. Uthi usegqigqe esibhedlela iminyaka emibili eyobuza ngayo kulokhu kuthenjiswa ukuthi izofakwa kwi-akhawunti yakhe.
“Sengiyasola ukuthi le ncwadi babenginikela ukuthi ngilokhu ngihleli nginethemba lokuthi bazonginika. Le mali ngangiyibona ukuthi incane kodwa ngavuma ngoba ngizwa indlela ababexolisa ngayo ngephutha labo. Uma sebeshona ezintangeni sengiyabona ukuthi babedlala ngami befuna ngiphume esibhedlela,” kusho yena.
UNksz Sindi Mthethwa okhulumela lesi sibhedlela uthe ubengenalo ulwazi ngalesi sigameko kodwa usazophenya ngaphambi kokuthi aphendule ngokugcwele.