Indlala yamanzi emtholampilo
UTHWELE kanzima umphakathi waseMaQadini, eMzinyathi, eNanda, okuthiwa usujwayele ukuhlala ungenamanzi. Lesi simo sesithikameza nokusebenza komtholampilo obizwa ngeQadi okuyiwo wodwa osiza umphakathi waseMzinyathi nengxenye yaseNdwedwe. Umfundi waleli phephandaba obhale incwadi eya kumhleli wacela ukungadalulwa ukhale ngengwadla yokushoda kwamanzi emtholampilo.
Uthe sekuphele isikhathi esingangonyaka amanzi engabonwa emtholampilo. Uveze ukuthi isimo samathoyilethi asisesihle ngenxa yale nkinga kulo mtholampilo.
Isolezwe livakashele umtholampilo ngoLwesihlanu lafica ngasesangweni kukleliswe izigubhu ezinamanzi. Bekubekelwe isigubhu esingenamanzi kwelinye ithangi kuphuma amaconsi.
Abanye abasebenzi namalungu omphakathi akhulume naleli phephandaba bathe sekujwayelekile ukuphela kwamanzi kule ndawo kodwa isimo siba simbi emtholampilo ngoba adingeka kakhulu. Bathe nezimoto eziletha amanzi ziyagqoza okwenza kube nzima.
Ebuzwa ngale nkinga uSister Zanele Ngidi, ongumphathi eQadi, uthe ngeke aphawule ngalolu daba, wakhomba intatheli kubaphathi bakhe.
UMnyango wezeMpilo KwaZuluNatal uthe akuthintwe uMasipala weTheku ngalolu daba.
UNksz Tozi Mthethwa okhulumela umasipala uvumile ukuthi zikhona izindawo ezinenkinga yamanzi eMzinyathi.
Uthe uphiko lwezamanzi kumasipala luyawaletha amathangi ezindaweni ezinenkinga.
“Uphiko lwethu lwezamanzi lusebenzisana nekhansela ukuchazela umphakathi ngale nkinga kube khona nemihlangano eminingi. Mayelana nomtholampilo, kunesiphakamiso esenziwe ngokuhlanganyela nekhansela sokuthi kubekwe ithangi eduze kwasemtholampilo elizofakwa amanzi. Sisemaphethelweni alolu hlelo,” kusho uNksz Mthethwa.
Uthe kunohlelo olubizwa ngeWestern Aquaduct, oluzoqinisekisa ukuthi amanzi ayatholakala eMzinyathi wathi luzosiza ngokuphakela amanzi eNtshangwe, Ntuzuma, Pinetown naseTshelimnyama ukuqinisekisa ukuthi iTheku alinayo inkinga yamanzi eminyakeni engu-30 ezayo.