Uhlelo iChampions Programme lukhiqiza abantu abaletha intuthuko emphakathini
UHLELO okuhloswe ngalo ukuthuthukisa umphakathi olubizwa nge-The Champions Programme olwenziwa Inyuvesi YakwaZulu-Natali (UKZN) ngokubambisana noMnyango wokuThuthukiswa koMnotho, ezokuVakasha nokongiwa kweMvelo KwaZulu-Natali lusiza ekutheni abantu bathuthuke benze ngcono imiphakathi abayakhele.
Ngalolu hlelo kuhlonzwa abathile emphakathini eyakhele isifundazwe, abachazwa njengabantu abaletha ushintsho ngenxa yesimo sezomnotho. Abaningi sebeqokwe nawo masipala imbala.
Lolu hlelo lubizwa nge-Champions Programme, njengoba kusuke kuhlangene abantu abanomqondo wokuletha ushintsho abathathwa njengezingqwele ezizoshintsha impilo yabanye. Lezi zingqwele ziyathuthukiswa ngokufakwa ezinhlelweni zokuzimela emabhizinisini, okuzozenza zikwazi ukubheka okufunwa wumphakathi.
Lolu hlelo olungaphansi kwe Regional and Local Economic Development Initiative (RLEDI) eGraduate School of Business & Leadership luthatha unyaka owodwa lapho lezi zingqwele zihlala izinsuku ezimbili enyangeni esikoleni lapho zifundiswa ngezihloko eziningi ezethulwa ngongoti kwezamabhizinisi.
Sibhekisisa kahle iziNgqwele zango-2017
UCebisile Buthelezi onefemuiCebisile Fashion Academyokuthungwa kuyo izingubo uphinde afundise abantu baseLadysmith ukuthunga.
ULindani Mkhanyawo ophethe ikhaya lezintandane eNanda elibizwa ngeYouth in Careers, uhlose ukuhlinzeka ngezinye izinto eziwusizo njengokuqwashisa ngengculazi nokufundisa ngemikhakha ekhona kwezithinta impilo nomsebenzi.
UGordon Ngcoya- umqondo wakhe webhizinisi wukuhlinzeka abaseNanda ngamakhono adingekayo emphakathini njengokufuya izinkukhu nokulima.
UPelican Ntombela- ibhizinisi lakhe elibizwa nge-Ignition, uhlose ngalo ukuxhumanisa osomabhizinisi abasafufusa emphakathini waseHowick.
UZinhle Vezi - waya eChina eyofunda ngonogwaja, manje naye usesebenza ngabakhe epulazini lomngani wakhe, eHowick.
UMolebogeng Miyene - ibhizinisi lakhe iBikoland Creations – lenza izikhwama neminye imikhiqizo yesikhumba.
UYabo Makhanya noMildred Dlamini bangabanikazi benkampani i- EYABO Innovative Enterprise Development Solutions ePort Shepstone. Baba nemibukiso futhi bahlele ukuba nesikhungo sentsha esizogxila kwezemfundo, amabhizinisi nokuziphatha.
UNokulunga Mhlongo uhlele ukuba nebhikawozi yakhe, adayise nezinkukhu eMelmoth.
USiboniso Mazibuko, ozinze eNewcastle, uyingxenye yeMajuba Fashion Cluster. Uhlose ukusungula ibhizinisi elizosiza umphakathi.
UZwakele Khumalo, ibhizinisi lakhe iZwakele Communications – lizinze eNanda futhi ligxile ekwakheni izingqwembe ezifakwa emgwaqweni. Ugxile kwezokuxhumana.
UBright Hlongwane - ibhizinisi lakhe i-Youth in Business South Africa - lihlinzeka ngezifundo ezingambi eqolo futhi liyasiza nasekubhaleni uhlelo lokusebenza kwebhizinisi.
UNosipho Phiri, ozinze eKwaDukuza, uzitshalela izithelo futhi uyazidayisa. Uhlose ukuqeqesha abantu kwezokulima.