UTete kumthathe imizuzwana ewu-11 ukuqeda ngoGonya
UZIFAKE emabhukwini omlando esibhakela somhlaba umshayisibhakela wase-East London, uZolani “Last Born” Tete, ovikele ngempumelelo ibhande le-World Boxing Organisation (WBO) Bantamweight kuSiboniso “Tiger” Gonya waKwaZulu-Natal empini ebikade ise-SSE Arena eBelfast, e-United Kingdom ngoMgqibelo ebusuku.
UTete uqede ngoGonya ngemuva kwemizuzwana ewu-11 iqalile impi ebikade ibhekwe ngabomvu. Ukuwina kwakhe kumenze waqopha umlando wokuba ngumshayisibhakela owine ngomngqimuzo womlalisa phansi osheshayo kunayo yonke empini yebhande lomhlaba.
Ngokolwazi oluqoshiwe, uDaniel Jimenez wasePuerto Rico uyena obekade ephethe irekhodi. Wahlula uHerald Geier emuva kwemizuzwana ewu-20 empini yebhande le-WBO super bantamweight ngo1994. Irekhodi elincikene nelikaJimenez elaqoshwa nguGerald McClellan wase-USA owahlula uJay Bell emuva kwemizuzwana ewu-24 empini yebhande le-World Boxing Council (WBC) middleweight ngo-1993.
UTete bekungokokuqala evikela ibhande le-WBO aliwine ngo-Ephreli ehlula u-Arthur Villanueva wasePhilippines. UGonya, ophethe ibhande le-WBO Inter-Continental bantamweight, bekulindeleke ukuthi azibonakalise esibhakeleni somhlaba.
Nokho isibhakela sesokudla sikaTete esihlale emhlathini simlahle phansi. Unompempe umbalele kodwa washeshe wakunqamula lokho, wabiza odokotela eringini ngoba uGonya ubebukeka engasaphefumuli.
Ikhona likaTete, alibhiyozanga ngaleso sikhathi ngoba bekungakaziwa ukuthi uGonya ulimele kangakanani. Emuva kwemizuzu odokotela bemxilonga eringini, kudume ihlombe ngesikhathi esevuka ezihlalela. Bekungokwesibili uGonya ehlulwa selokhu eqale isibhakela esikhokhelayo ngo-2011. Ugcine ukuhlulwa nguThabo Sishwane wase-East London ngo2013 ngamaphuzu empini eyayiseMdantsane. UTete usezanyelwa impi ehlanganisa izicoco nompetha we-International Boxing Federation (IBF) Bantamweight neWorld Boxing Association (WBA) Super uRyan Burnett wase-UK.