ICeltic kowamanqamu eTelkom eThekwini
LIPHINDE lahlomula ngomunye umdlalo wamanqamu iTheku njengoba izolo kuvele ukuthi iBidvest Wits izobe ingosokhaya uma isithuthana neBloemfontein Celtic ePrincess Magogo Stadium ngoDisemba 2.
Lo mdlalo uzokuba ngo-6 ntambama.
Leli dolobha lisanda kuba nomdlalo wamanqamu weMTN 8 noweNedbank Cup.
Lokhu kuvele izolo ntambama ngesikhathi kuqhathwa la maqembu ePeter Mokoba Stadium.
ICeltic eyathatha le ndebe ngo-2012 izifake kowamanqamu eTelkom Knockout izolo ntambama ngemuva kokuqumba phansi iPolokwane City ngo 4-3 kumaphenathi.
Umdlalo obusePeter Mokaba Stadium uphele ngo 0-0. Esikhathini esengeziwe kugcine kubanjenwe ngo 1-1 okuphoqe ukuthi kube amaphenathi azokhipha umanqoba. UTshegofasa Mabasa ushaye igoli leCeltic kwathi uRendani Ndou wabuya nelokulinganisa leRise and Shine.
IPhunya Sele Sele izoqhuthana neWits ehlule iKaizer Chiefs ngo 1-0 komunye umdlalo obewandulela owamanqamu ngoMgqibelo ntambama.
Iqembu laseBloemfontein lakhala lemuka nendebe ngo2012 liholwa uClinton Larsen. Indlela elibonakala lihlangene ngayo ngaphansi komqeqeshi waseSerbia uJelusic Veselin libonakala lizoba yingozi kwiWits kowamanqamu.
Umqeqeshi weWits uGavin Hunt yize ejabule ngokubona iqembu lakhe lidlulela kowamanqamu kodwa uthe uncamela amaphuzu amathathu ngenxa yesimo abakusona kwi-Absa Premiership.
IZitshudeni ezingompetha beligi banyakenye zihleli endaweni yesibili ukusuka emsileni kwi-log.
“Siyawamukela umphumela kodwa ngincamela amaphuzu amathathu okwamanje. Uyasanganisa lo msebenzi,” kusho uHunt.
Kusasa iWits inomdlalo onzima lapho izokwamukela iMamelodi Sundowns koweligi eBidvest Stadium ngo-7.30 ebusuku.
IWits enqobe izicoco ezimbili ngesizini edlule eseligi neMTN 8 yagcina le ndebe ngo-1995 isabizwa ngeCoca-Cola Cup.