U-Da Gama ukhala ngokushisa kwensimbi ku-NFD
UKHALA ngokushisa kwensimbi kwiNational First Division (NFD), u-Owen Da Gama, osephosele inselelo abanye ozakwabo athi banethezekile kwi-Absa Premiership ukuthi bezozwa ukushisa kwensimbi esigabeni esingezansi.
UHighlands Park eqoqe amaphuzu amathathu ihlula Uthongathi FC ngo 1-0 wegoli likaPeter Shalulile esiwombeni sesibili emdlalweni weNFD obusePrincess Magogo Stadium, KwaMashu, ngoMgqibelo ntambama. Iqhwakele kwi-log ngamaphuzu awu-22 emuva kwemidlalo ewu11. IHighlands, egawulwe yizembe kwi-Absa Premiership ekupheleni kwesizini edlule, iqashe uDa Gama ngoSepthemba emuva kokuxoshwa kwakhe kwiBafana Bafana esiza u-Ephraim “Shakes” Mashaba. Isizini ka-2017/2018 yeNFD iqalwe nguThierry Mulonzo. Nakuba iHighlands Park ibhekane noThongathi, olusanda kusayinisa uDiyo Sibisi, bekulindeleke ukuthi izihambele kodwa igcine iwajulukela amaphuzu amathathu.
“Sibhekane neqembu elinzima kakhulu, lihlelekile. Bawenze waba nzima umsebenzi wethu. Indlela esidlale ngayo ibingekho ezingeni elifanele. Besingebukhali. Kodwa senze obekufanele sikwenze. Sithatha umdlalo ngamunye, asibhekile ukuwina iligi. Kufanele sisebenze kanzima njengoba sizobhekana neWitbank Spurs,” kusho uDa Gama.
“Le ligi inzima kakhulu. Abanye babaqeqeshi abanethezekile kwiPSL abehle beze lapha. Bazomangala. Kudlalwa uqina thambo lapha futhi kuyasheshwa. Kunabadlali abasezingeni eliphezulu.Ukwehliswa kwesibalo sabadlali abangaphansi kuka-23 ukuthi kuqale ababili ngomdlalo sekunyusele iligi kwelinye izinga.”
UThongathi lunamaphuzu awu11emuva kwemidlalo ewu-11. Umqeqeshi uRonnie Gabriel uthe ngeke batatazeliswe wukugqoza kwemiphumela ngoba ukholwa wukuthi abafana bakhe basayibambe kahle.
Imiphumela ye-NFD: Pretoria University 0-0 Ubuntu FC; Royal Eagles 0-3 Real Kings; Richards Bay 0-0 Witbank Spurs; Uthongathi 0-1 Highlands Park; Mbombela United 3-0 Thsakuma; Black Leopards 2-0 Mthatha Bucks; Stellenbosch 2-2 Jomo Cosmos Super Eagles 1-0 Cape Town All Stars.