Kudutshulwe usihlalo kasoseshini wafa
ASASHAQEKILE amalungu kasoseshini iMasibambisane, eJozini, ngemuva kokudutshulwa kukasihlalo wawo, uMnuz Bhekinkosi Fakude, ngesikhathi ephuma emhlanganweni ngoLwesibili ntambama.
UFakude kuthiwa udutshulelwe ngaphandle kwesitolo sakwaSpar, eMkhuze, washonela endaweni yesehlakalo.
IPhini likaSihlalo, uMnuz Petros Ngubane, lithe basakhungathekile ngokubulawa kukaFakude.
“Besinomhlangano wekomiti, siphume kukuhle futhi kanti kuzokwenzeka le nto,” kusho uNgubane.
Uthe imbangela yokuhlaselwa kukaFakude ibingakaziwa.
“Nakuba kubuye kube khona ukungaboni ngaso linye kumalungu okubuye kudlule kodwa besingacabangi ukuthi kungaze kuholele ekutheni kugcine sekuphuma isidumbu,” kusho uNgubane.
Umthombo weSolezwe oseJozini wona uthe usola ukungaboni ngaso linye okukhona phakathi kukasoseshini iMasibambisane nososeshini waseThekwini ohamba amabanga amade mayelana nombango womzila.
“Ukhona umbango okhona mayelana nokuthuthwa kwabagibeli phakathi kwamalungu ososeshini ababili. Wukungezwani kwabo osekuholele ekutheni singabi sihle isimo,” kusho umthombo.
Uthe iMasibumbane iyabasusa abagibeli ibayise eThekwini bese ibuya igengqeza, wengeza ngokuthi neTheku liyabaletha eJozini libuyele emuva lingenabagibeli.
Kodwa uNgubane ukuchithile lokho okushiwo umthombo wathi ayikho inkinga ekhona emzileni wabo waseThekwini.
Okhulumela amaphoyisa KwaZuluNatal, uLt Colonel Thulani Zwane, uthe ngoLwesibili ngehora lesihlanu ntambama uSihlalo kasoseshini iMasibumbane udutshulwe washona ngesikhathi ephambi kwesitolo sakwaSpar eMkhuze.
UZwane uthe okwamanje imbangela yokubulawa kukaFakude ibingakaziwa. Isolezwe liphinde lathola ukuthi kuke kwaba khona ingxabano ekhona ethinta itekisi elathengwa obenguSihlalo kasoseshini eyagcina idayisiwe ngaphandle kokwazisa isigungu.
Kodwa uNgubane ukuchithile ukuthi kukhona ingxabano ekhona mayelana netekisi likasoseshini eladayiswa.
“Leyo tekisi ikhona yenza umsebenzi kasosesheni,” kusho uNgubane.
UNgqongqoshe wezokuThutha nokuPhepha KwaZuluNatal, uMnuz Mxolisi Kaunda, izolo uzwakalise ukushaqeka ngokubulawa kukaFakude.
UKaunda uthe icala lokubulawa kukaFakude seludluliselwe ethimbeni lamaphoyisa eliphenya amacala enzeke embonini yamatekisi.
UKaunda uphinde wazwakalisa ukukhathazeka ngokwenyuka kokubulawa kosomatekisi KwaZulu-Natal.
“Lezi zigameko azamukelekile ngoba zigcina sezibeka engcupheni nempilo yabagibeli,” kusho uKaunda.