Bafundisa begadwe abazali
BASEBENZA begadwe abazali nomphakathi othisha base-Iwahlanga Lower Primary, eTaylors Halt ngaphandle kwaseMgungundlovu, ngemuva kokusongelwa ngokufa kukathishanhloko nothisha.
Kuthiwa uthishanhloko nothisha bakulesi sikole babhalelwe izingqwembe zabekwa esangweni lesikole, kwashintshwa nokhiye wesango kwafakwa amaketango angaziwa.
Kulezi zingqwembe kuthiwa kwakubhalwe ukuthi: “Thishomkhulu lo Grade 5 ofuna ukuwufaka, uzowufaka ethuneni.” Kwenye incwadi kubhalwe ukuthi: “Ngikunikeza usuku lwakusasa kuphela uvale lesi sikole ngaphandle kwalokho kuzophuma amabhokisi angu-13.” Abasebenzi bakulesi sikole bangu-13. Okhulumela amaphoyisa KwaZulu-Natal, uCaptain Nqobile Gwala ukuqinisekisile ukuthi kuvulwe amacala amabili okusabisa.
“Kuvulwe icala lokusabisa kulandela ukusatshiswa ngombhalo. Kwaphinde kwavulwa icala lokuceleka phansi impahla. Womabili amacala enzeka esikoleni. Akekho oboshiwe kodwa kuyaphenywa.”
Usihlalo wesigungu sabazali (SGB), uNkk Thenjiwe Mpulo uvumile ukuthi sebehlala ngokuqapha isimo esikoleni ukuze othisha nabafundi bezophepha.
“Asazi ukuthi ubani osongayo nokwenza singazi ukuthi izingane nothisha baphephile yini. Savumelana siwumphakathi nabazali ukuthi sizophonsa iso ngokushintshana esikoleni. Namaphoyisa siwacelile ukuba ahlale ezulazula esikoleni,” kusho uNkk Mpulo.
Uthe izinxushunxushu esikoleni zaqala ngesikhathi kuhlongozwa ukuhlanganiswa kwalesi sikole esiqala kuGrade R kuya kuGrade 4 nesinye esingumakhelwane iTaylors Primary, esiqala kuGrade 5 siphele kuGrade 7.
“Umphakathi awuvumelananga nomnyango ngokuhlanganiswa kwezikole. Kwaze kwayekwa ukuhlanganiswa kwazo. Uthishanhloko wethu kwabe sekuthiwa akafake isicelo kumnyango ukuba kwengezwe ikilasi sibe noGrade 5. Saphasa isicelo sethu, ngonyaka ozayo ubuzoqala uGrade 5. Ngiyasola kukhona abangakuthandanga lokho njengoba kwaqala lapho ukuba khona kwezinsongo nokukhiywa kwesikole,” kusho uNkk Mpulo.
Okhulumela uMnyango wezeMfundo KwaZulu-Natal uMnuz Sicelo Khuzwayo ukhuze lesi simo wathi uma abazali noma umphakathi kukhona ongakuthandi kumele ukhulume nesigungu sabazali.
“Ukuphepha kwabasebenzi bethu yikhona okumqoka kakhulu njengoba uthishanhloko engekho kulesi sikole kulandela ukusatshiswa ngempilo yakho. Umphakathi nabazali banelungelo lokukhuluma uma kukhona abangakuthandi, asikho isidingo sokuba kusatshiswe abasebenzi bethu,” kusho uKhuzwayo.
Umzali okhulume neSolezwe wacela ukungadalulwa uthe sebecabanga ukuzikhipha izingane zabo kulesi sikole ngoba aziphephile.
“Kunzima ukuba sibuyisele izingane zethu empini. Kuyacaca ukuthi kuyaliwa kulesi sikole. Asazi ukuthi isikhathi sokufunda bazosithola yini. Sikhathazekile kakhulu ngoba kuzophoqa ukuba siyise izingane zethu esikoleni lapho kumele zigibele khona ngoba yisona kuphela isikole samabanga aphansi esiseduze lesi,” kusho umzali okhathazekile.