Bakhathazwa wukuphela kwamanzi nogesi abaseMgungundlovu
BASABA ukuthi bangase badle uKhisimusi bengenawo amanzi nogesi abantu abahlala eMgungundlovu emuva kokuvalelwa amanzi ngesonto eledlule nakuleli sonto.
Abantu baseMbali, Pelham, Northdale, Mafakatini naseWillowfontein batshele Isolezwe ukuthi ukuphela kukagesi nokuvalwa kwamanzi yinto eyenzeka imihla namalanga eMgungundlovu.
UNkk Dudu Biyase (56) waseMbali utshele Isolezwe ukuthi abaxwayiswa uma kuzophela amanzi ukuze bahlale behlomile.
“Sivele sibone amanzi engasekho, angisayiphathi-ke eyokuphela kukagesi ngoba uphela njalo. Siyafisa ukuthi umasipala ulusukumele lolu daba,” kusho uNkk Biyase.
UMnuz Sipho Zuma waseWillowfontein uthe sekunesikhathi bengenawo amanzi eWillowfontein kodwa ekhona eMbali naseSweetwaters.
“Amanzi sesiwalethelwa yiloli eliwathwalayo ngoba ompompi bahlala bome nkwe. Asazi ukuthi kungani umasipala ungasitsheli ukuthi kunenkinga,” kusho uZuma.
UNkk Thobeka Mafumbatha okhulumela uMasipala waseMsunduzi uthe amanzi aqedwa yisomiso futhi nguMnyango wezaManzi neNhlanzeko onciphisa amanzi athunyelwa komasipala.
Uthe eMgungundlovu bebengakayitholi imvula enele kwazise idamu i-Albert Falls linamanzi ami ku-21%, iMidmar inamanzi angu-76% kanti ithola amanzi asuka eSpring Grove Dam, eMeanrs Weir naseMooir River.
“Isimo sizoba ngcono uma kuna imvula eyanele. Izinqolobane zethu eziseWillowfontein azigcwele ngenxa yokungabibikho kwemvula eyanele yingakho amanzi engekho. UMnyango wezokuBusa ngokuBambisana nezoMdabu wakhe izinqolobane ezintathu ezintsha ezithola amanzi enqolobaneni i-Azalea esendaweni ephakeme okwenza kube nzima ukuyigcwalisa ngamanzi,” kusho uNkk Mafumbatha.
Uthe sebekhiphe amaloli amahlanu aphakela abantu amanzi eWillowfontein babhola nezimbobo ukuze bakhe amanzi ngaphansi komhlaba.
Ubehlise amaphaphu abantu baseMgungundlovu ebathembisa ukuthi izinkinga zokungabibikho kwamanzi nogesi ngeke zibahluphe ngoba umasipala wenza konke okusemandleni ukuzilungisa.
Uthe kunohlelo lokulungisa lezi zingqinamba olwenziwa nguMasipala waseMsunduzi.