Uqashwe ngokugcwele esikhundleni kwiSAPS
UMENGAMELI Jacob Zuma ugcine eqoke uKhomishana wamaphoyisa oqashwe ngokugcwele kuzwelonke uGeneral Khehla John Sitole, emuva kokuthi iNingizimu Afrika isihlale iminyaka emibili inokhomishana abebebambile.
USitole ubeyiNhloko yoPhiko lwezokuvikela kuzwelonke. Useke waba ngukhomishana wamaphoyisa esifundazweni iFree State.
Esitatimendeni esithunyelwe yihhovisi likaMengameli Jacob Zuma uthe: “USitole unamava eminyaka emaphoyiseni, okuzomsiza ukwenza umsebenzi wakhe wokuqinisekisa ukuthi abantu baseNingizimu Afrika baphephile. Simfisela konke okuhle esikhundleni sakhe,” kusho uZuma.
USitole uzalwa eStanderton eMpumalanga. Waqala ebuphoyiseni ngo-1986.
“Ubelokhu ekhula emsebenzini wakhe ezikhundleni zobuphoyisa kwazise ngo-2011 uqale ukungena ezikhundleni kuzwelonke enguLietenant General,” kusho uZuma.
UZuma ubonge uLieutenant General Lesetja Mothiba ngokubamba esikhundleni ngesikhathi kusabhekwa ukhomishana omusha. Imizamo yokuzwa ukuphawula kwamaqembu epolitiki ngokuqokwa kukaSitole ayiphumelelanga kwazise amaningi abekhala ngokuthi amalungu awo asePhalamende ekomitini eliphenya ngenkohlakalo ebiyenzeka kwaEskom nokusetshenziswa kombuso yidlanzana.
UMnuz Zakhele Mbhele okhulumela iDA kwezamaphoyisa uthe abakholwa ukuthi uSitole kukhona kusha eza nakho kodwa bazolokhu bewuqaphile umsebenzi wakhe.
Kusukela ngo-2005 lesi sikhundla sesibanjwe ngabantu abayisikhombisa abanye babo abebebambile.
-1995-2002 General George Fivaz owathatha umhlalaphansi ngenxa yokukhula.
-2002 -2009 General Jackie Selebi owalahlwa yicala wabhala ejele.
-2009-2011 General Bheki Cele owayeqashwe ngokugcwele waphuma esikhundleni emuva kwezinsolo zokukhishwa kwezinkontileka zamabhilidi ayezosetshenziswa ngamaphoyisa, ngaphandle kokulandela imithetho efanele. -2011-2012 General Nhlanhla Mkhwanazi owayebambile wamiswa ngemuva kwezinsolo zokuthi ubudlelwano abubuhle phakathi kwakhe nowayengungqongqoshe wamaphoyisa uMnuz Nathi Nhleko.
-2012-2015 General Riah Phiyega owayeqashwe ngokugcwele waphuma esikhundleni emuva kokuthi ikhomishini eyayiphenya ngokubulawa kwabavukuzi abangu-34 eMarikana, eNorth West ithole ukuthi akasilungele isikhundla.
-2015-2017 General Kgomotso Phahlane obebambile umiswe emuva kokuthi inhlangano ephenya amaphoyisa i-Indepdent Police Investigative Directorate (Ipid) ifake izincomo zokuthi akakulungele ukuba sesikhundleni.
-Juni 2017 Lt General Lesetja Mothiba obebambile uphume sekungena uSitole.