I-KZN isilele ngokuhlaliswa kwamagatsha
IKWAZULU-Natal yisona sifundazwe se-ANC esisilele emuva ekuhlaliseni amagatsha njengoba kuyiwa engqungqutheleni yokukhetha ubuholi ngoDisemba.
Ngokwezibalo ezikhishwe yi-ANC esithangamini nabezindaba eGoli izolo, lesi sifundazwe sisemuva ngokuhlalisa amagatsha angu-122 abengakahlali emagatsheni angu-806 agunyazwe ukuthi aye engqungqutheleni esifundazweni.
Lesi sifundazwe silandelwa yi-Eastern Cape esalelwe ukuhlalisa amagatsha angu-71 njengoba kusahlale angu-530 kwangu-601 agunyazwe ukuya kule ngqungquthela.
IGauteng ilele isithathu njengoba kusamele ihlalise amagatsha angu-41. Isahlalise angu-435 kwangu-476.
INorthern Cape kuphela esiphothule ukuhlaliswa kwamagatsha esize yaba nomhlangano wesifundazwe lapho imemezele khona ukuthi izoseka iphini likamengameli we-ANC, uMnuz Cyril Ramaphosa ukuthi abe ngumengameli eNasrec, eGoli ngoDisemba.
IMpumalanga, elele isibili ngokwezibalo zamalungu aya engqungqutheleni, isalelwe ukuhlalisa amagatsha amathathu.
UNobhala jikelele we-ANC, uMnuz Gwede Mantashe, uthe ingqungquthela izoqala ngoDisemba 16 kuya ku-20.
Uthe bayaqhubeka bashusha izifundazwe ukuthi ziphothule ukuhlaliswa kwamagatsha ukuze zibe nemihlangano yezifundazwe.
Uthe okwamanje yi-ANC, uphiko lwentsha lwe-ANC nolwabesifazane abasaphakamise abaholi abafuna bahole inhlangano ngoDisemba.
“Angu-90% amagatsha asekulungele ukuya engqungqutheleni. Izikhalo sizixazulula njengoba kuqhubeka imihlangano yamagatsha. Ngempelasonto silindele ukuthi i-Western Cape ibe nomhlangano wesifundazwe lapho izomemezela khona abaholi efuna bahole inhlangano. I-Eastern Cape ithe izohlala ngeSonto nangoMsombuluko kanti nezinye izifundazwe siyazishusha ukuthi ziphothule imihlangano yamagatsha bese ihlalisa umhlangano wesifundazwe. Ngeke ibe khona imihlangano yezifundazwe ngemuva kwempelasonto ezayo,” kusho uMantashe.
I-ANC ilule isikhathi sokuhlala kwamagatsha kuze kube uMgqibelo.
UMantashe uthe bonke abantu abaphakanyiswe yizifundazwe bazongena ohlwini lwabantu abazovotelwa engqungqutheleni.
Uthe ukuphakanyiswa kwabaholi abaphezulu i-Top 6 engqungqutheleni kuzokwenzeka ngosuku lwesibili lwengqungquthela.
UMantashe ugcizelele ukuthi izohlala ingqungquthela nakuba kunezinkulumo zokuthi kungenzeka igcine ingahlalanga. Uthe bazokhetha ubuholi obusha ngoba umengameli okhona usephathe amahlandla amabili.
Uqhube wathi ngeke bakuvumele ukushuthwa kwamaphepha okuvotela abaholi uma sekuvotwa.