Owayengumengameli nesexwayiso
OWAKE waba nguMengameli wakuleli uMnuz Kgalema Motlanthe uthe iNingizimu Afrika kumele kube khona ekufundayo ngokuketulwa kukamengamel Robert Mugabe waseZimbabwe. UMotlanthe ubekhuluma ohlelweni iForum at 8 kwiSAFM izolo. Uthe okwenzeke eZimbabwe kumele kubavule amehlo nabanye omengameli ezwenikazi i-Afrika.
“Kubalulekile ukuthi kube khona esikufundayo ngokwenzeka eZimbabwe ukuze kungasehleli nathi,”kusho uMotlanthe.
Umncomile uMugabe, wathi wenze into enhle wesula esikhundleni.
“UMugabe usekhulile ekubeni umsebenzi wokuba ngumengameli uyakhandlana. Ukuba ngumengameli bese kuvele kungasamfanele ngenxa yesimo sempilo,” kusho uMotlanthe.
USihlalo kazwelonke we-ANC uNkk Baleka Mbete uhambe emazwini kaMotlanthe wathi ujabule ukuthi uMugabe ugcine esulile esikhundleni ngaphambi kokuthi akhishwe ngevoti.
“Ukube akazange esule ubezokhishwa ngevoti bese eyaphoxeka, kuthi wonke amagalelo akhe emzabalazweni ashabalale,” kusho uNkk Mbete.
Uthe okwenzeke eZimbabwe kumele kube khona ekufundayo i-Afrika yonkana kukho.
UMugabe usula nje ubevele eseyalelwe ngamasosha ezwe lakhe ukuthi akahlale endlini angaphumi ngemuva kokuthi umbutho wezempi uthathe izintambo zombuso. UMugabe uqale wagoloza ukuphuma esikhundleni, lwagcina lugobile uphondo.
Ukuqunjwa phansi kukaMugabe kwamukelwe ngenhlokomo ngabaseZimbabwe abasabalele umhlaba wonke abebekhala ngokuthi ubebacindezele.
UMugabe (93) ubesebe ngumengameli wezwe lakhe kusukela ngo-1980.
Khonamanjalo uMnuz Emmerson Mnangagwa okuthiwa nguye ozongena ezintanjeni zombuso njengomengameli wesikhashana udlule eNingizimu Afrika wabonana noMengameli Jacob Zuma. Kulindeleke ukuthi uMnangagwa afungiswe ephalamende laseZimbabwe ngoLwesihlanu emuva kokuthi uMugabe esule esikhundleni ngoLwesithathu ebusuku.
Akucaci ukuthi uMugabe uzohlala kuphi emuva kokwesula esikhundleni. Izolo aboMnyango wezangaPhandle baveze ukuthi ngeke lihoxiswe icala lokushaya elabekwa uNkk Grace Mugabe, uma kuwukuthi uzobhaca kuleli.
Izolo iPhini likaNgqongqoshe wezangaPhandle uMnuz Luwellyn Landers, lithe bebengakasitholi isicelo sokubhaca kukaMugabe kuleli.
Uthe uma uNkk Mugabe eza eNingizimu Afrika azikho izinhlelo zokuthi angashushiswa ngecala lokushaya intokazi eyayijuxuza nezingane zakhe, uNksz Gabriella Engels ngoba izinkantolo zizimele.