I-Numsa iyagoloza ngesiteleka
I-NATIONAL Union of Metal Workers of South Africa (Numsa) ithi ngeke babuyele emsebenzini abasebenzi baseWhirlpool bengalutholanga uxhaso lukaR500 oluzobasiza ukuthi bakhokhele izindlu.
I-Whirlpool yifemu eyakha amafriji, imishini yokuwasha nenye impahla kagesi eKwaSithebe, eMandeni.
UNobhala Jikelele weNumsa KwaZulu-Natal, uMnuz Mbuso Ngubane uthe ayikho inqubekela phambili phakathi kwabo nabaqashi ngakho isiteleka sizoqhubeka.
“Kudala abasebenzi baseWhirlpool becela umhlomulo wezindlu kodwa bezitshwa.
Kulo nyaka inkampani iqale ukuxoxa nathi ngesikhathi sebelaxaze amathuluzi. Siqale sacela isibonelelo sikaR1 000 kodwa sasehlisa saba ngu-R500 ngemuva kokuthi abaqashi bekhalile,” kusho uNgubane.
Uthe emuva kwalokho abaqashi babeke isibonelelo sikaR150 wezindlu babuye basisusa etafuleni uma iNumsa icela ukunikwa isikhathi sokuyoxoxa nabasebenzi.
“Abasebenzi bazoqhubeka nokuteleka baze bathole izimfuno zabo. Isiteleka sizoba sikhulu ngoba sizongenelwa nangabanye abasebenzi basemafemini aKwaSithebe nosomatekisi abasithuthela abasebenzi. Esikudingayo yimpilo engcono kubasebenzi bethu ngoba imali abayiholayo yenza bahlale emijondolo,” kusho uNgubane.
AbakwaWhirlpool bathe isiteleka siyazwela ngoba sehlisa umkhiqizo wabo okufanele bawuthumele emakhasimendeni ahlukene.
UNksz Michelle Morrick obhekelele ezokuxhumana kwaWhirlpool uthe bazimisele ukuxoxa neNumsa ukuze kuphele isiteleka.
“I-Whirlpool iyilungu leMetal Engineering Industries Association okuyinhlangano exoxa izindaba zamaholo nemihlomulo kuzwelonke. Abaphathi befemu eKwaZulu-Natal bazamile ukuxoxisana neNumsa kodwa yakunqaba obekubekwe etafuleni,” kusho uNksz Morrick.
Uthe bakhathazekile ngasiteleka futhi bafisa isixazululo sitholakale maduze.