Bajabule abakuleli ngesiphakamiso se-Icasa nge-data
IZIHLATHI zizovakashela izindlebe kubantu baseNingizimu Afrika emuva kokuthi inhlangano ebhekelele ezokuxhumana eNingizimu Afrika i-Independent Communications Authority of South Africa (Icasa) iphakamise ukuthi i-data kufanele iphelelwe yisikhathi emuva kweminyaka emithathu.
I-Icasa iqale uphenyo ngokumba eqolo kwe-data emuva kokuthola izikhalo kubantu baseNingizimu Afrika.
Ucwaningo lwe-Icasa luthole ukuthi imba eqolo i-data eNingizimu Afrika futhi kufanele kubuyekezwe imithetho evumela izinkampani zamaselula ukuthi zithathe imali eningi kubantu uma sebephelelwe yi-data.
UNksz Botlenyana Mokhele we-Icasa uthe okwamanje bafuna kubuyekezwe i-EndUser and Subscriber Service Charter (EUSS) ukuze kuvikelwe amakhasimende anamaselula abathole ukuthi awaphathwa kahle uma kuziwa ngasekuchazelweni ngemikhiqizo yamaselula.
“Ngo-Agasti sithole iziphakamiso ezingu-20 kubantu besitshela ukuthi bafuna kwenziweni. Namanje sicela baphawule njengoba sithi idata kumele iphelelwe yisikhathi emuva kweminyaka emithathu. Esikubonile wukuthi abantu bakhokha imali enkulu uma sebephelelwe yi-data abayikhokhela nyangazonke,” kusho uNksz Mokhele. Uthe iyashesha nanokuphelelwa yisikhathi kanti abantu bakhokha kakhulu noma befona ngamaselula noma bethumela ama-SMS.
Nazi iziphakamiso ze-Icasa nge-data
-Kumele i-data ihlale iminyaka emithathu ngaphandle uma umnikazi wayo eyisebenzise yaphela.
-Umuntu kufanele athunyelelwe umlayezo omchazelayo ukuthi usebenzise i-data engakanani imtshele uma esebenzise u-50%, 70%, 90% no-100%.
-Amaminithi, ama-SMS ne-data engasetshenziswanga yikhasimende kufanele adlulele enyangeni ezayo hhayi ukuthi anyamalale uma sekuqala entsha.
-Abantu mabanikezwe ithuba lokuzikhethela ukuthi bafuna ukukhokha imali emba eqolo uma sebephelelwe yi-data noma bafuna ukukhokhiswa imali elingana naleyo ekhokhwa yizinkampani zamaselula.
UNksz Mokhele uthe abafisa ukuphawula kufanele babhale phansi iziphakamiso zabo kungadluli uJanuwari 3, 2018 bazithumele kwa-Icasa.
Emuva kwalokho i-Icasa izoba nezinkundla zokucobelelana ngolwazi nomphakathi ezizoqala ngoFebhuwari 7 ziphele ngoFebhuwari 9, 2018.
Kulindeleke ukuthi imithetho emisha ezolawula amadata neminye imikhiqizo yamaselula ishaywe ngoMashi 31, 2018.