AbeNFP basongela ingqungquthela
UHLANGOTHI oluhambisana noMengameli weNFP, uNkk Zanele Magwaza-Msibi lufunge lwagomela izolo ukuthi luzoyivimba ngenkantolo ingqungquthela yeqembu yesifundazwe okulindeleke ibe seNatu House eNewcastle, ngempelasonto.
Esithangamini nabezindaba ePinetown izolo, uMnuz Mzwamandla Mzobe ozichaza ngokuthi unguNobhala wesigungu sesikhashana esihola iqembu KwaZulu-Natal uthe kumanje bamatasa nohlelo lomthetho lokuvimba ukuthi le ngqungquthela ibe khona.
“Silinde abameli bethu ukuba bafake enkantolo isicelo sokuthi kuvinjelwe le ngqungquthela ukuba ihlale ngoba ayikho emthethweni kanti nabantu abayibizayo sesabaphuca ubulungu beqembu,” kusho uMzobe.
UMzobe uthe ababiza ingqungquthela bafuna ukuntshontsha iqembu.
USihlalo weqembu oThungulu, uMnuz Gadaffi Dlamini uxwayise ngokuthi bazogasela eNatu House beyoyinyomfa ingqungquthela uma iqhubeka.
“Sekwanele manje. Sikhathele ukudlala amanye amadoda,” kusho uDlamini.
Ethintwa uSihlalo weNFP KwaZulu-Natal uMnuz Vikizitha Mlotshwa uthe konke sekumi ngomumo mayelana namalungiselo okusingatha ingqungquthela. “Ingqungquthela iyaqhubeka eNewcastle ngempelasonto njengoba kuhleliwe,” kusho uMlotshwa.
Uthe bayilandele yonke imigudu yokwenza ingqungquthela.
“Besilindele ukuthi iPhini likaMengameli uMnuz Alex Kekana kube yilona elivula ingqungquthela kodwa ngenxa yokuthi lilinyalelwe yindodana yalo ngeke likwazi, ingqungquthela isizovulwa yibamba likaNobhala-jikelele uMnuz Phumlani Zwane. UMlotshwa uthe balindele ukuthi ingqungquthela yabo ihambe kahle njengoba nezokuphepha zizobe ziqinile.
Uthe amalungu azoxoxa, enze iziphakamiso ngekusasa likaNkk Magwaza-Msibi njengoba engumuntu ongaphilile kahle.
“Umthethosisekelo weqembu uthi umengameli kumele aphathe amahlandla amabili, elokuqala useliqedile manje uqala elesibili kodwa ngenxa yokugula okumbambile, angazidalelanga kona sizowadedela amalungu ayixoxe indaba yakhe mhlawumbe kungenzeka kuchitshiyelwe umthethosisekelo kodwa angisho ukuthi kuzokwenzeka njalo. Lokhu kulele emalungwini.”