Kuxwayiswa abathenga umvusankunzi
KUXWAYISWA abesilisa ukuthi bagweme ukuthenga imishanguzo yokuvusa induku bengazange baxoxe nodokotela njengoba kulindeleke ukuthi sinyuke isibalo sabathenga le mishanguzo ngamaholidi.
UNksz Nicole Jennings okhulumela inkampani ekhiqiza imishanguzo, iPharma Dynamics, uthe abesilisa kufanele bakugweme ukuthenga le mishanguzo ezitolo ngaphandle kokuxoxa nodokotela.
“Abakwazi ukuthenga le mishanguzo emakhemisi (ngaphandle kwencwadi kadokotela). Iningi lemishanguzo ekhangiswa kwi-internet isuke idayiswa ngokungemthetho futhi ingombombayi abadayiswa ngemali encane kakhulu kunemishanguzo yangempela. Le mishanguzo yaziwa ngokuba yingozi kakhulu njengoba isuke ingahloliwe ukuqinisekisa ukuthi ingadayiswa ngokusemthethweni. Imishanguzo yokuvusa induku ithengwa ngencwadi ekhishwe ngudokotela oqeqeshiwe kuphela,” kusho uNkk Jennings.
Uthe bengenye yezinkampani ezikhiqiza imishanguzo esemthethweni yokuvusa induku bavame ukubona sinyuka isibalo sabantu abayithengayo ngesikhathi samaholidi kaDisemba.
Uthe siyanda isibalo sabesilisa abanenkinga yokungavuki kwenduku ngenxa yendlela abaphila ngayo. Lokhu kuholela ekutheni bande abadinga le mishanguzo.
Izifo okubalwa kuzo isifo sikashukela, umfutho ophezulu wegazi, ukungadli ngendlela, ukungazivocavoci, ukuphuza ngokweqile nokubhema kungezinye zezizathu eziholela ekutheni abantu besilisa bazithole benale nkinga.
Ngokusho kukaNksz Jennings kubalulekile ukuthi abesilisa abanenkinga baxoxe nodokotela njengoba kungesibo bonke abadinga ukuthatha imishanguzo – udokotela okwazi ukucacisa ngalokhu.