I-ANC izodingida ngekusasa lobeyimeya yaseMfuleni

LINGASE lidingidwe yikomiti le-ANC elibhekele ukuziphatha ikusasa lobeyiMeya yaseMfuleni, uMnuz Simon Mofokeng, kule nhlangano njengoSihlalo we-ANC esifundeni iSedibeng.

UMofokeng wesule esikhundleni sobumeya ngoMsombuluko ngemuva kokuthi engene ehlazweni ngokufaka isithombe sentombazane eneminyaka ewu14 engagqokile ku-WhatsApp akuwo nabanye abaholi, kuhlanganisa namalungu ePhalamende, obizwa ngeFestival of Ideas.

Umthombo we-Independent Media uthe usihlalo wekomiti kuzobe kungumakadebona we-ANC, uMnuz Andrew Mlangeni, ozothatha isinqumo esingujuqu ngekusasa likaMofokeng. NgoLwesibili uMlangeni uthe uzoze abe khona ngesonto elizayo.NgoMsombuluko isigungu esiphezulu se-ANC esifundeni saseSedibeng besisemhlanganweni nesigungu esiphezulu sesifundazwe.

UMnuz Yusuf Mahommad, we-ANC Youth Legue esifundeni iSedibeng, uthe uMofokeng akaphoqwanga ukuthi esule esikhundleni sakhe kodwa wenze into efanele.

Uqhube wathi wumkhandlu wesifunda ohlanganiswe amagatsha ayisibalo esingu-70% ongasusa uMofokeng kungenjalo kumele ehle esikhundleni uma sekunengqungquthela elandelayo.

Okhulumela amaphoyisa, uLt Col Lungelo Dlamini, uthe alikho icala eselivuliwe ngalesi sehlo wathi amaphoyisa asacubungulisisa ulwazi.

UMnuz Kingsol Chabalala oyilungu le-DA ePhalamende wahlaba umkhosi ngalesi sigameko ngenyanga edlule. Uthe ukwesula kukaMofokeng emsebenzini akumele kuvimbele ukuthi lolu daba luphenywe ngabomthetho.

UMofokeng kulindeleke ukuthi avele ngoLwesibili enkantolo yemantshi iVanderbiljlpark lapho ezobe ezama ukumisa isivimbelo sesikhashana esimnqabela ukuthi aphinde abonane nale ntombazane eneminyaka ewu-14.

UChabalala uthe icala lencwadi yokuvikela intombazane liyisiqalo sokuthi uMofokeng abekwe icala ngokusemthethweni.