Silungiselela ukushada kodwa angisaluthokozeli ucansi
EZOTHANDO
UMBUZO: Ngingowesifazane oneminyaka ewu-30, ngithandana nowesilisa oneminyaka ewu-36. Sineminyaka emihlanu sindawonye, sesilungiselela ngisho ukushada kodwa inkinga ukuthi angisaluthokozeli ucansi lwethu.
Kuvele kuthi angizisakaze phansi uma sindawonye. Angazi ibizwa ngani le nto engehlekelayo ngoba ngiyamkhumbula uma engekho. Sihle, eThekwini Impendulo: Sihle, kubalulekile ukuthi nilunonge uthando lwenu ngale kwaloko nizogcina seningakuthokozeli ukuba ndawonye. Noma yini eyenziwa ngendlela efanayo ngazo zonke izikhathi igcina ikhathaza.
Nisebancane kakhulu futhi anikashadi njengoba seninalezi zinkinga. Ngakho kubalulekile ukuthi nilusukumele lolu daba.
Hlala phansi nesithandwa sakho usazise ukuthi ubona kungcono nishintshe indlela yokwenza ukuze uthando lwenu lukhuthaze.
Okubalulekile yindlela omazisa ngayo. Khuluma ngendlela ekhombisa ukumhlonipha, engakhombisi ukusola yena. Umbuzo: Ngiyindoda enonyaka owodwa ishadile. Inkinga ukuthi sengiphelelwe wuthando lukankosikazi wami. Akusavumi ngisho ngimthinte. Unenkani, sixabana njalo futhi akawaboni ngisho amaphutha akhe uma sixabana.
Sengimbonise ngakhathala. Angisenanda ngisho nokuthi wenzani. Sengiyazibukela nje Bhodloza Mkhize, KwaMsani Impendulo: Kubukeka sengathi usulilahlile ithemba kunkosikazi wakho. Asiliphonsi ithawula ngabantu esibathandayo. Sengathi unkosikazi wakho unenkinga yolaka nenhliziyo encane. Zinike isikhathi ukuze uthole ukuthi yini ngempela emenza abe nenhliziyo encane kangaka.
Abanye kuyenzeka ukuthi kunezinto ababhekene nazo okuze kwenze izinhliziyo zabo ziqine.
Uma ekhuluma awazi amazwi aphukelayo kuwena. Ayikho into ebaluleke njengenhlonipho emshadweni. Unkosikazi ohlakaniphile uzoshintsha indlela yokwenza uma senikhulumile. Umbuzo: Ngathandana nowesifazane eminyakeni ngo-2013. Sagcina ukubonana ngawo lowo nyaka kodwa ngowedlule ngezwa ngaye esengithinta ethi asibonane.
Ngagcine sengimtshelile ukuthi kukhona umuntu engithandana naye. Waphinda ekuqaleni kwalo nyaka esasho okufanayo. Ngagcina ngivumile sahlangana lapho ngiqashe khona okwaphela ngokuthi sizithokozise ngocansi.
Emva kwamasontwana ambalwa sibonene wangithinta futhi kodwa manje ethi usekhulelwe. Ngimelwe ingqondo ngoba ngagcina ukumbona mhla siya emqashweni futhi asikaze sikhulume emva kwalokho njengoba esethi ukhulelwe manje.
Kungenzeka yini ukuthi ubezongithwalisa isisu engingasaz?. Kungani ubefuna kangaka ukuthi sihlangane? Mhlampe akuyona nje eyami lengane.
Jobe, eGauteng Impendulo: Iyodwa vo indlela ozokwazi ngayo ukuthi ingane eyakho noma cha. Kuzomele nihlole ulibofuzo lwengane uma isizelwe ukuze ube nesiqiniseko. Mazise ukuthi ngoba ningabantu ababonana kanye nje kuphela uyafuna ukuba nesiqiniseko ukuthi lomntwana owakho.
Lolu cwaningo ungalwenza esibhedlela esiseduze nawe futhi aluthathi isikhathi eside. Okunye okubalulekile ukuthi umazise lo othandana naye ngendaba yengane. Ikakhulukazi uma sewazi ukuthi ngeyakho ngoba ngeke ulibalekele iqiniso. Umbuzo: Ngisanda kuthola ukuthi isoka lami esinomntwana nalo alithembekile kimina. Okungisabisa kakhulu ukuthi wangithelela ngengculazi engakuthola ngoba sengikhulelwe. Manje usezothelela le ngane yabantu athandana nayo engazi lutho ngesimo sakhe.
Ngingasiza kanjani lo wesifazane ukuze angazitholi esesimweni esifana nesami?
Nonfuneko, Umzimkhulu Impendulo: Isoka lakho liyingozi kakhulu kwabesifazane elihlangana nabo. Abantu abanalesi sifo banokukhiphela ukudinwa kwabo ngokuthola lesi sifo kwabanye abantu. Umuntu athandane nabesifazane abaningi ngoba azama ukugqiba ukugula kwakhe noma njengendlela yokuziphindiselela ikakhulukazi mangabe lesifo asithola komunye umuntu.
Ukugula komuntu kuyimfihlo yakhe ngakho kuyingozi ukukhuluma ngokho komunye umuntu. Zame ezinye izindlela zokumbonisa lo wesifazane ukuthi kubalulekile ukuzivikela. Isoka lakho lingangakuthokozela ukuthi uhambe wayoneka ukugula kwalo komunye umuntu.
Empeleni ungamtshela nokuthi uma owesifazane emazisa ngokugula kwakhe uzomazisa wena. Uzosaba ukuthi indaba iphume ngawe. Angahle athande ukuthi kube nguyena okhipha indaba. Facebook: Mo & Phindi Instagram: Mo & Phindi Email: info@moandphindi. com