Obenguthisha ulaxaze umsebenzi walandela ubizo
WESULE emsebenzini walandela ubizo uthisha womculo, ozohlonipha abanye asebethathe umhlalaphansi KwaNyuswa, ngoLwesihlanu.
UMnuz Mnqobi Khumalo (35) obefundisa iCreative Art, ushiye kulo nyaka ngoFebhuwari emsebenzini ukuze agxile esikoleni sakhe somculo. UKhumalo ungomunye wabasunguli besikole esifundisa ngomculo, Ubizo The School of Art.
“Bese kuneminyaka emithathu sifundisa izingane umculo nokudlala izinsimbi kodwa ngisibhalise ngokusemthethweni kulo nyaka. Lokhu kufana nobizo kimina ngoba umculo ngakhuliswa ngawo. Ngisho ubaba wayengumbhidi wamakwaya,” kuchaza uKhumalo.
Uthe yena nethimba lakhe bavakashela izikole zamabanga aphansi, bafundise umculo nokudlala izinsimbi. Bavakashela izikole ezisemphakathini kwaNyuswa, Nqetho nakwaNgcolosi. UKhumalo uthe kukhona nohlelo lokusiza izingane ezihlala emgwaqweni, ukuzifundisa umculo ukugwema ukuthi zibizwe ngamaphara emphakathini. Kulolu hlelo bahlanganyela eValley Trust KwaNyuswa, bazifundise umculo.
“Zingu-27 izingane esizithole emgwaqweni ezikulolu hlelo. Sihlose ukuthi sikhulume nestudyo esiqopha umculo ukuze ezinye ziqophe ekwayeni esiyihlanganisayo yoBizo. Ezinye zizonandisa nakuwona umcimbi wokuhlonipha othisha,” kusho uKhumalo.
Uthe isikole Ubizo sesinabafundi abalinganiselwa ku-70. Ngaphandle kwaso uKhumalo uphinde enze izithangami zokucobelelana ngolwazi nabadlali bezinsimbi emasontweni nabadumisayo. Inhloso yalokhu ukubafundisa indlela yokuziphatha uma benikwe lo msebenzi emasontweni. Uphinde abakhuthaze ngokuthi badlale zonke izinsimbi ngaphandle kokugxila esitayeleni setende, athe kwande sona emasontweni.
Mayelana nomcimbi wokuhlonipha othisha, uthe bangu-17 abazochonywa uphaphe legwalagwala. Iningi labo bayibamba ezikoleni baze bathatha umhlalaphansi. Uthe abanye babe neqhaza elikhulu ekusungulweni kwezikole zaKwaNyuswa.
Echaza ngombono walo mcimbi, uthe yize umnyango wezemfundo ubaklomelisa othisha, bakhona abashiyeka ngaphandle abanamagalelo. Naye uKhumalo uke waba kwiTop 3 kumaTeachers Awards esifundazweni. Ngonyaka ozayo uzimisele ukuhlonipha abaholi bamabandla emphakathini, ngonyaka olandelayo aklomelise intsha enamagalelo avelele.
UKhumalo ube nguthisha iminyaka eyisishiyagalombili ngaphambi kokwesula nonyaka. Ubebuye asize izikole ezahlukene emculweni wamakwaya nasemincintswaneni yezikole yezobuciko. Wakhula ecula esontweni waphinde wazifundisa ukudlala upiyano. Uke waba yilungu leqembu lowokholo iConnection Choir, wayengumdidiyeli womculo kuyo. Ngo-2010 leli qembu lacula kumaSABC Crown Gospel Music Awards, labuye layocula nase-Australia.