Bagwetshiwe abemishwalense
INKANTOLO eNkulu yaseMgungungdlovu igwebe abesifazane ababili iminyaka engu-31 umuntu ngamunye emuva kokuvuma amacala okuba ongqondongqondo ekubulaleni abantu ngenhloso yokuzicebisa ngemali yomshwalense.
Ngokusho kokhululumela oKlebe KwaZulu-Natal, uCaptain Simphiwe Mhlongo, oHlengiwe Zuma (41) noFisani Khoza (40) bazivumele ukuthi babejoyinisa abantu imishwalense bese beyabasoconga.
Kuthiwa bathole iminyaka engu-15 ngamacala okubulala, eyisishiyagalombili ngokuzama ukubulala neminye eyisishiyagalombili ngokukhwabanisa, izigwebo bazozidonsa kanye kanye.
Kuthiwa babefike baphuzise abagilwa utshwala bese bebathatha beyobashayisa ngemoto emgwaqweni ukuze kubonakale sengathi babandakanyeke engozini yomgwaqo. Kuthiwa abagilwa ababili kulaba ngoMnuz Sonosakhe Mdlalose noMzomuhle Zuma, ababulawa. Kuthiwa uma laba babefika isicelo semali yomshwalense bese behlukaniselana imali uma isiphumile.
Kuthiwa uphenyo lwamaphoyisa olunzulu lwaveza nokuthi omunye umgilwa uMnuz Bongani Gcabashe wadutshulwa wabulawa eGwinyamathe, eMatimatolo, ngo-2016 emuva kokuboshwa kwabasolwa.
Kuthiwa omunye umgilwa wasinda ngokulambisa emuva kokuthi bemshayise ngemoto bamshiya bethi ushonile kanti uzothola usizo, wasinda. Kuthiwa lowo mgilwa wesifazane wayengumsebenzi wasendlini. Kuvele ukuthi laba abagwetshiwe bathola imali engu-R1.3 million ezinkampanini zemishwalense ezahlukene.
Empeleni babebahlanu abasolwa kuleli cala eladonsa amehlo abantu abaningi. Abathathu babo abakagwetshwa, okungoMnuz Zamokwakhe Khanyile (37), Doda Khumalo(37) noNksz Jabulie Zaca (54).
Icala labo lizobuyela eNkantolo eNkulu eMgungundlovu ngoNovemba 30.