Sehlile esabahushula izisu ehlathini
SEHLILE isibalo sabesifazane abafika ezikhungweni zezempilo zikahulumeni benezinkinga ezidalwa ukuhushula izisu ngokungekho emthethweni.
Lokhu kuvezwe nguNgqongqoshe wezeMpilo KwaZulu-Natal, uDkt Sibongiseni Dhlomo ekhuluma emhlanganweni obuphakathi komnyango nezinhlangano ezisebenzisana nawo eMgungundlovu, ngoLwesibili.
Uthe ngenxa yokuqiniswa kwemikhankaso yabo yokulwa nokusetshenziswa kwezikhungo ezihushula izisu ngokungekho emthethweni, sesehlile isibalo sabafika benezinkinga ezidalwe ukuhambela lezo zikhungo.
“Umnyango ukubona lokhu ngokunyuka kwezibalo zabesifazane abeza ezikhungweni zikahulumeni bezohushula izisu.
“Ngo-2013 bebengu-8 058 okuyisibalo esesifinyelele ku-14 209. Sehlile isibalo sabesifazane abafika nezinkinga ezidalwa ukuhushula izisu ngokungemthetho, uma kuqhathaniswa nesikhathi singakayiqali imikhankaso.
“Ngo-2014 babengu-10 786 (abantu ababefika nalezi zinkinga) ngo-2016 lesi sibalo sehle safika ku-8 633,” kusho uDkt Dhlomo.
Uthe nezibalo zezikhungo ezinika usizo lokuhushula izisu ngokusemthethweni sesinyukile njengoba bezingu-14 ngo-2015 kodwa sezifinyelele ku-42 ngo2017.
Ngaphandle kwalokhu kwehle nesibalo sabesifazane abashona ngezizathu ezihlobene nokuphuphunyelwa yizisu.
Phakathi kuka-2011 no 2013 bebengu-53, ngo-2014 kuya ku-2016 bebengu-27. Lesi sibalo sehle safinyelela kwabahlanu ngo-2016.
Uthe lezi zibalo ziyathembisa futhi zikhombisa ukuthi uMnyango wezeMpilo wenza umsebenzi omuhle ezinhlelweni zokuhushulwa kwezisu ngokusemthethweni kodwa lokho akusho ukuthi kufanele bahlale bangabe besasebenza kanzima ukuqinisekisa ukuthi banikeza izinhlelo zempilo ezisezingeni elifanele.
Ngaphandle kwalokhu uphawule ngezinhlelo asebezifakile zokulashwa komdlavuza esifundazweni.
Lesi sifundazwe sibe ngundabuzekwayo emuva kokuvela kwezinkinga ngokulashwa komdlavuza njengoba iSouth African Human Rights Commission yasola yena nomnyango wakhe ngokubukela phansi amalungelo abantu abahaqwe umdlavuza ngokungakusukumeli ukuxazulula izinkinga ezaziholele ekutheni iziguli zinganakekelwa ngendlela.
Ezinye zezinto azibalile kube ukuqashwa ngokuphelele kodokotela abelapha umdlavuza. Uthe esibhedlela iGrey’s eMgungundlovu bane abaqashiwe. Esibhedlela e-Addington uthe akakabibikho udokotela owelapha umdlavuza kodwa kunomshini othengiwe ngesikhathi kusalungiswa omunye.
Uthe zilinganiselwa ku-250 iziguli ezinomdlavuza esezilashwe ngokohlelo lweChemotherapy.