Ugqugquzela intsha ingene kwezolimo
UGQUGQUZELE intsha ukuthi ingene kwezolimo ngoba yizona ezizoletha inkululeko yomnotho, uMnuz Zolani Ngcingwana onepulazi elingama-hectare angu-800.
UNgcingwana (65) owathenga ipulazi ngo-2011, uveze ukuthi wasizwa ukuya ebhange ayoboleka imali ngoba yize uhulumeni enezinhlelo zokusiza abalimi kodwa miningi imicikilisho edingekayo ngaphambi kokuthi umuntu athole imali.
Ngaphambi kokuba wumlimi, uNgcingwana wayesemkhakheni wokudayisa.
Uthi kwaba lula ukushintshela kwezolimo ngoba kwakuyinto azifela ngayo.
Uzalwa emndenini onolwazi lokudayisa nokulima ngaseKokstad.
“Kudala ngenkathi abantu abamnyama bengakakwazi ukuba nomhlaba noma bawuqashe, ubaba wayeqhamuke neqhinga lokuqasha ipulazi lomlungu owumngani wakhe. Ngavele ngaphelelwa wuthando lokudayisa ngangena kwezolimo ” kusho uNgcingwana.
Ugqugquzele osomabhizinisi ukuthi basebenze ngokuzikhandla ngoba yikona okuletha inzuzo.
Ngaphambi kokuba wumnikazi weYellow Star Farm ngo-2011, uNgcingwana wayenezitolo eMount Frere nasePort St Johns nendawo ekhiqiza amapali eMthatha. Wagcina eqome ukwenza into ayithandayo, wase ethenga ipulazi lombila nezinkomo.
I-Yellow Star Farm iqashe ngokuphelele abasebenzi abangu-10 nabetoho abangu-20. UNgcingwana ufisa ukuthi izingane zakhe ziqhubeke lapho agcine khona uma esethathe umhlalaphansi.
UNgcingwana akakabi nazinhlelo zokuthatha umhlalaphansi njengoba sekukhona ipulazi lezimvu aselibonile afisa ukulithenga.
UNgcingwana, oneminyaka ewu-40 eshadelwe unezingane ezine, uthi umndeni wakhe uyigugu kuye.
Uthe wasizwa Ithala ngemali athenga ngayo ipulazi wathi uthanda ukuzibophezela kwabaseThala ekuthuthukiseni abantu abamnyama kwezomnotho.
UNgcingwana ukhuthaza osomabhizinisi nalabo abasafufusa abadinga usizo lwemali, ikakhulu intsha, ukuthi bavakashele igatsha lasebhange langakubo.
“Ngifisa ukuthi ngabe ziningi izinhlelo ezenzelwe intsha ukuyigqugquzela ukuthi ingene kwezolimo ngoba kulapho kutholakala khona inkululeko yezomnotho. Ngikholwa wukuthi aluluningi usizo olunikwa intsha njengamanje ukuyilekelela ezidingweni zayo,” kusho uNgcingwana.