Bexwayisa ngokumosa imali ngoBlack Friday osomnotho
IZAZI zomnotho zidonse ngendlebe abantu baseNingizimu Afrika ukuthi bangadidwa yindali kaBlack Friday baze bakhohlwe ukuphilela ikusasa.
UDkt Christoph Nieuwoudt oyisikhulu esibhekelele ezabathengi kwa-FNB uthe indali kaBlack Friday neyeCyber Monday izongenisa imali edingeka emnothweni waseNingizimu Afrika.
Uthe abaningi bazoma kolayini ngoLwesihlanu ukuze bayothenga abakudingayo ezitolo kodwa labo abasebenzisa ubuchwepheshe besimanje ngeke bashayisane ngezifuna ezitolo kodwa bazothenga kwi-internet ngeCyber Monday.
Uthe iBlack Friday yindali eyenzeka emhlabeni jikelele ukuqinisekisa ukuthi amakhasimende athola akudingayo nalokho akuhalelayo ngamanani aphansi.
“Abantu baseNingizimu Afrika sebeqalile ukuthenga kwi-internet futhi siyazi abaningi ngeke bafune ukuma kolayini abade yingakho bezothenga impahla besebenzisa amakhompyutha namaselula. Siyajabula ukuthi namakhasimende ethu azokwazi ukuthenga akudingayo ngale ndlela ngoba siwafakele i-app yethu esebenza noma ungenawo amadata,” kusho uNieuwoudt.
Udonse ngendlebe abantu ukuthi bathenge abakudingayo futhi baqhubeke nokonga imali ngoba impilo iyaqhubeka noma sekudlule indali kaBlack Friday.
USolwazi Bonke Dumisa uthe abantu kumele bathenge abakudingayo hhayi ukukhithiza impahla engenasidingo ngoba kuthiwa isendalini.
Unxuse abantu ukuthi baqaphele ukuthenga amabhodlela otshwala obubizayo ngoba kuthiwa bazobukhokhela izinyanga eziyisithupha.
“UBlack Friday uheha abantu ngendali ezitolo ezihlukene. Akungamoswa imali ngoBlack Friday. Siyacela abantu bathenge abakudingayo futhi basebenzise imali abanayo hhayi ukuthi bathenge ngesikweletu,” kusho uDumisa othe isimo somnotho asisihle kahle kuleli ngakho kudingeka abantu baqhubeke nokonga ngoba nophethroli uyanyuka kanjalo nezindleko zokuphila.